ബെംഗളൂരു: കർണാടകയില് ഉപതിരഞ്ഞെടുപ്പ് നടന്ന ദാവണഗെരെ സൗത്ത്, ബാഗൽകോട്ട് മണ്ഡലങ്ങള് നിലനിര്ത്തി കോൺഗ്രസ്. മുതിർന്ന കോൺഗ്രസ് നേതാക്കളും മുൻ മന്ത്രിമാരുമായ ശാമന്നൂർ ശിവശങ്കരപ്പയും എച്ച്.വൈ.മേട്ടിയും മരിച്ചതിനെ തുടർന്നാണ് ദാവനഗെരെ സൗത്തിലും ബാഗൽക്കോട്ടിലും ഉപതിരഞ്ഞെടുപ്പിന് കളമൊരുങ്ങിയത്. ബാഗൽക്കോട്ടിൽ അന്തരിച്ച എം.എൽ.എ. എച്ച്.വൈ. മേട്ടിയുടെ മകൻ ഉമേഷ് മേട്ടിയാണ് വിജയിച്ചത്. ബിജെപിയുടെ വീരണ്ണ ചരന്തിമഠിനെ 22,332 വോട്ടുകൾക്കാണ് പരാജയപ്പെടുത്തിയത്. ദാവനഗെരെ സൗത്തിൽ ശാമന്നൂർ ശിവശങ്കരപ്പയുടെ മകന് കോൺഗ്രസിന്റെ സമർഥ് മല്ലികാർജുന ബിജെപിയുടെ ശ്രീനിവാസ് ടി.ദാസ കരിയപ്പയെ 5,708 വോട്ടുകള്ക്കും തോല്പ്പിച്ചു.
ദാവനഗെരെ സൗത്തില് ഇഞ്ചോടിഞ്ച് മത്സരമാണ് നടന്നത് ആദ്യ ഏഴ് റൗണ്ടുകളിൽ ബിജെപി സ്ഥാനാർത്ഥി ശ്രീനിവാസ് ടി.ദാസ കരിയപ്പയ 5,000 വോട്ടുകളുടെ ലീഡ് നേടിയെങ്കിലും, ശേഷിക്കുന്ന 17 റൗണ്ടുകളിൽ കോൺഗ്രസിന്റെ സമർത് മല്ലികാർജുനിന് അനുകൂലമായി ലീഡ് മാറി. അതേസമയം സോഷ്യൽ ഡെമോക്രാറ്റിക് പാർട്ടി ഓഫ് ഇന്ത്യ (എസ്ഡിപിഐ) സ്ഥാനാർത്ഥി 19,000 ഓളം വോട്ടുകൾ ഇവിടെ നേടി. 2023 ലെ നിയമസഭാ തെരഞ്ഞെടുപ്പിൽ, എസ്ഡിപിഐ മണ്ഡലത്തിൽ 1,131 വോട്ടുകൾ മാത്രമാണ് നേടിയത്.
