ചെന്നൈ: തമിഴ്നാട് നിയമസഭാ തിരഞ്ഞെടുപ്പില്‍ അട്ടിമറി മുന്നേറ്റവുമായി നടൻ വിജയിയുടെ തമിഴക വെട്രി കഴകം. ആകെയുള്ള 234 സീറ്റുകളിൽ 110 ഇടങ്ങളിൽ ടിവികെ ലീഡ് ചെയ്യുന്നു. ഡിഎംകെ, എഐഎഡിഎംകെ, ബിജെപി സഖ്യം എന്നിവരുമായി നടന്ന ശക്തമായ ത്രികോണ മത്സരത്തിലാണ് പുതിയ രാഷ്ട്രീയ ശക്തിയായി വിജയ് ഉദിച്ചുയരുന്നത്. ടിവികെയുടെ കുതിപ്പിൽ വൻ നഷ്ടം സംഭവിച്ചത് ഡിഎംകെയ്ക്കാണ്. ആദ്യമായി തെരഞ്ഞെടുപ്പ് ഗോദയിലിറങ്ങിയ ടി.വി.കെ, തമിഴ്നാട്ടിലെ വലിയ ശക്തിയായി മാറുന്ന കാഴ്ചയാണ് കണ്ടത്.
കേവലഭൂരിപക്ഷമായ 118 സീറ്റ് നേടാൻ ടിവികെയ്ക്ക് സാധിക്കുമോ എന്ന കാര്യം നിലവിൽ വ്യക്തമല്ലെങ്കിലും തമിഴ്മണ്ണിലെ പുത്തൻ രാഷ്ട്രീയതാരത്തിന്റെ കുതിച്ചുപായലിനാണ് വോട്ടെണ്ണൽ കേന്ദ്രങ്ങൾ സാക്ഷ്യംവഹിച്ചത്. പെരമ്പൂർ, തിരുച്ചിറപ്പള്ളി ഈസ്റ്റ് എന്നിങ്ങനെ രണ്ടു മണ്ഡലങ്ങളിൽനിന്നാണ് വിജയ് ജനവിധി നേടിയത്. നിലവിൽ രണ്ടിടത്തും അദ്ദേഹം ലീഡ് ചെയ്യുകയാണ്.
നിലവിലെ ഏറ്റവും വലിയ ഒറ്റക്കക്ഷിയായ ടിവികെയ്ക്ക് തമിഴ്നാടിൻ്റെ അധികാരം പിടിക്കണമെങ്കിൽ ഡിഎംകെ അല്ലെങ്കിൽ എഐഎഡിഎംകെയുമായി കൈകോർക്കണം. രാഷ്ട്രീയശത്രുവായി പ്രഖ്യാപിച്ച ഡിഎംകെയുമായും ആശയപരമായ ശത്രുവായ ബിജെപിയുടെ സഖ്യകക്ഷിയായ എഐഡിഎംകെയുമായും സഹകരിക്കാതെയും ചിലപ്പോൾ വിജയ് നീങ്ങിയേക്കാം. എഐഎഡിഎംകെയുടെയും ഡിഎംകെയുടെയും ചെറുസഖ്യകക്ഷികളായ പിഎംകെ, ഡിഎംഡികെ, വിസികെ പോലുള്ള പാർട്ടികളുടെ പിന്തുണ സ്വീകരിച്ചേക്കാനും സാധ്യതയുണ്ടെന്ന് വിലയിരുത്തപ്പെടുന്നു.
അതേസമയം തമിഴ്നാട് നിയമസഭാ തെരഞ്ഞെടുപ്പിൽ ഡി എം കെ അധ്യക്ഷനും മുഖ്യമന്ത്രിയുമായ എം കെ സ്റ്റാലിന്‍ കൊളത്തൂർ മണ്ഡലത്തിൽ പരാജയം ഏറ്റുവാങ്ങി. നടൻ വിജയ്‌യുടെ പാർട്ടിയായ തമിഴക വെട്രി കഴകം (ടി വി കെ) സ്ഥാനാർത്ഥി വി എസ് ബാബുവാണ് സ്റ്റാലിനെ അട്ടിമറിച്ചത്. 2021 ൽ 70,000-ത്തിലധികം വോട്ടുകളുടെ വമ്പൻ ഭൂരിപക്ഷത്തിന് വിജയിച്ച മണ്ഡലത്തിലാണ് ഇത്തവണ സ്റ്റാലിൻ അടിതെറ്റി വീണത്. മുഖ്യമന്ത്രി തന്നെ പരാജയപ്പെട്ടത് തമിഴ്നാട് രാഷ്ട്രീയത്തെയും ഡി എം കെ കേന്ദ്രങ്ങളെയും രാജ്യത്തെയും ഒരുപോലെ വിസ്മയിപ്പിച്ചിരിക്കുകയാണ്. വിജയ്‌യുടെ തേരോട്ടത്തിനിടയില്‍ ഡിഎംകെക്ക് 61 സീറ്റുകള്‍ മാത്രമാണ് നേടാനായത്. എഡിഎംകെക്ക് 44 സീറ്റുകളും പിഎംകെക്കും കോണ്‍ഗ്രസിനും അഞ്ച് സീറ്റുകള്‍ വീതവുമാണ് നേടാനായത്. അതേസമയം ബിജെപി തമിഴ്‌നാട്ടില്‍ മൂന്ന് മണ്ഡലങ്ങളില്‍ ഇടം പിടിച്ചിട്ടുണ്ട്. മുസ്‌ലീം ലീഗിന് രണ്ട് സീറ്റും ലഭിച്ചിട്ടുണ്ട്.
SUMMARY: Vijay’s TVK comes to power in Tamil Nadu
