മുംബൈ വീണ്ടും തോറ്റു; പ്ലേ ഓഫ് പ്രതീക്ഷ നിലനിര്‍ത്തി കൊല്‍ക്കത്ത

കൊൽക്കത്ത: ഐപിഎല്ലിലെ നിർണ്ണായക മത്സരത്തിൽ മുംബൈ ഇന്ത്യൻസിനെ നാലു വിക്കറ്റിന് കീഴടക്കി ഐ.പി.എൽ.ക്രിക്കറ്റിൽ പ്ലേ ഓഫ് പ്രതീക്ഷ നിലനിർത്തി കൊൽക്കത്ത നൈറ്റ് റൈഡേഴ്‌സ്. മുംബൈ മുന്നോട്ടുവെച്ച 148 റൺസ് വിജയലക്ഷ്യം നാല് വിക്കറ്റ് ബാക്കിനിൽക്കെ കൊൽക്കത്ത മറികടന്നു. കൊൽക്കത്തയ്ക്ക് വേണ്ടി മനീഷ് പാണ്ഡെ 45 റൺസും റോവ്മാൻ പവൽ 40 റൺസും നേടി. അജിങ്ക്യാ രഹാനെ 21 റൺസ് നേടി

മത്സരത്തില്‍ ആദ്യം ബാറ്റ് ചെയ്ത മുംബൈ നിശ്ചിത ഓവറില്‍ 8 വിക്കറ്റ് നഷ്ടത്തില്‍ 147 റണ്‍സ് മാത്രമാണ് നേടിയത്. കൊല്‍ക്കത്ത 18.5 ഓവറില്‍ 6 വിക്കറ്റ് നഷ്ടത്തില്‍ 148 റണ്‍സെടുത്താണ് വിജയം സ്വന്തമാക്കിയത്.

ജയത്തിലേക്ക് ബാറ്റെടുത്ത കൊല്‍ക്കത്തയ്ക്കായി പഴയ സൂപ്പര്‍ താരം മനീഷ് പാണ്ഡെ ടോപ് സ്‌കോററായി. താരം 33 പന്തില്‍ 6 ഫോറുകള്‍ സഹിതം 45 റണ്‍സെടുത്തു. മാന്‍ ഓഫ് ദി മാച്ചും മനീഷാണ്.

30 പന്തില്‍ 4 ഫോറും 2 സിക്‌സും സഹിതം 40 റണ്‍സെടുത്ത റോവ്മാന്‍ പവലാണ് തിളങ്ങിയ മറ്റൊരു താരം. ക്യാപ്റ്റന്‍ അജിന്‍ക്യ രഹാനെ 17 പന്തില്‍ 4 ഫോറുകള്‍ സഹിതം 21 റണ്‍സും കണ്ടെത്തി.

ബാറ്റിങില്‍ ടോപ് സ്‌കോററായ കോര്‍ബിന്‍ ബോഷ് തന്നെ ബൗളിങിലും നായകനായി. താരം 3 വിക്കറ്റുകള്‍ വീഴ്ത്തി. ദീപക് ചഹര്‍, ജസ്പ്രീത് ബുംറ, ഗാസ്‌നഫര്‍ എന്നിവര്‍ ഓരോ വിക്കറ്റെടുത്തു.

ടോസ് നേടി ബൗളിങ് എടുത്ത കെകെആര്‍ നായകന്‍ രഹാനെയുടെ തീരുമാനം ശരിയായി മാറുന്ന കാഴ്ചയായിരുന്നു ഈഡന്‍ ഗാര്‍ഡന്‍സില്‍. കൂറ്റനടിക്കു സമ്മതിക്കാതെ കൊല്‍ക്കത്ത ബൗളര്‍മാര്‍ പന്തെറിഞ്ഞതോടെ മുംബൈ വിയര്‍ത്തു.

എട്ടാമനായി ക്രീസിലെത്തിയ കോര്‍ബിന്‍ ബോഷാണ് ടോപ് സ്‌കോറര്‍. താരത്തിന്റെ കൂറ്റനടിയാണ് സ്‌കോര്‍ 140 കടത്തിയത്. 18 പന്തില്‍ 2 സിക്‌സും 3 ഫോറും സഹിതം ബോഷ് 32 റണ്‍സുമായി പുറത്താകാതെ നിന്നു. 26 റണ്‍സെടുത്ത ക്യാപ്റ്റന്‍ ഹര്‍ദിക് പാണ്ഡ്യ, 20 റണ്‍സെടുത്ത തിലക് വര്‍മ എന്നിവരാണ് തിളങ്ങിയ മറ്റുള്ളവര്‍.

4 ഓവറില്‍ വെറും 13 റണ്‍സ് മാത്രം വഴങ്ങി സുനില്‍ നരെയ്ന്‍ 1 വിക്കറ്റെടുത്ത് മുംബൈ ബാറ്റിങ് നിരയെ വെട്ടിലാക്കി. സൗരഭ് ദുബെ, കാമറോണ്‍ ഗ്രീന്‍, കാര്‍ത്തിക് ത്യാഗി എന്നിവര്‍ 2 വീതം വിക്കറ്റുകള്‍ വീഴ്ത്തി.

അവസാന ഏഴു കളികളിൽ ആറാം ജയമാണ് നൈറ്റ് റൈഡേഴ്‌സ് സ്വന്തമാക്കായത്. ഒരു മത്സരം അവശേഷിക്കെ കൊൽക്കത്ത 13 പോയിന്റുമായി ആറാം സ്ഥാനത്തെത്തി.

SUMMARY: Mumbai loses again; Kolkata keeps playoff hopes alive

.