ബെംഗളൂരു: കലബുറഗി ജില്ലയിലെ ലാഡ്ലാപൂരിന് സമീപം ക്രൂയിസർ വാഹനം ലോറിയുമായി കൂട്ടിയിടിച്ച് അഞ്ച് പേർ മരിച്ചു. ചിറ്റാപൂർ താലൂക്കിലെ വാഡിക്ക് സമീപം ദേശീയപാത 150 ൽ വെള്ളിയാഴ്ച രാത്രി വൈകിയായിരുന്നു അപകടം.
ഒരേ കുടുംബത്തിലെ അഞ്ച് പേരാണ് മരിച്ചത്. മഹ്മൂദ് ഹുസൈൻ (60), ഫാത്തിമ അബ്ദുൾ സാബ് (40), റസൂൽ ബീ (40), മഹ്ബൂബ് സംഗവി (37), ക്രൂയിസർ ഡ്രൈവർ ടോളു പാഷ (24) എന്നിവരാണ് മരിച്ചത്. ചിറ്റാപൂർ താലൂക്കിലെ ഇംഗലഗി ഗ്രാമത്തിൽ താമസിക്കുന്നവരാണ് മരിച്ചവരെല്ലാം.
कर्नाटक – कलबुर्गी में भीषण सड़क हादसा#KalaburagiAccident #Kalaburagi #Karnataka #RoadAccident #कलबुर्गी #कर्नाटक #सड़क_हादसा #RoadSafety #BreakingNews@KlbDistPolice pic.twitter.com/2fj7TeeIcf
— JAN TV (@JANTV2012) May 23, 2026
ന്യുമോണിയ ബാധിച്ച ബന്ധുവിനെ യാദ്ഗിറിലെ ആശുപത്രിയിൽ പ്രവേശിപ്പിച്ച ശേഷം വീട്ടിലേക്ക് മടങ്ങുകയായിരുന്ന കുടുംബമാണ് അപകടത്തിൽപ്പെട്ടത്. എട്ടുപേരുമായാണ് ക്രൂയിസർ വാഹനം ആശുപത്രിയിലേക്ക് പോയത്. രോഗിയെയും മറ്റ് രണ്ട് സഹായികളെയും അവിടെ നിർത്തിയ ശേഷം ഡ്രൈവർ ഉൾപ്പെടെ അഞ്ച് പേർ നാട്ടിലേക്ക് മടങ്ങുന്നതിനിടെയാണ് ദുരന്തം സംഭവിച്ചത്.
തമിഴ്നാട്ടിൽ നിന്നും അമിതവേഗതയിൽ എതിർദിശയിൽ വന്ന ലോറി ഇവർ സഞ്ചരിച്ചിരുന്ന വാഹനത്തിലേക്ക് ഇടിച്ചുകയറുകയായിരുന്നു. ഇടിയുടെ ആഘാതത്തിൽ ക്രൂയിസർ വാഹനത്തിന്റെ മുൻഭാഗം പൂർണ്ണമായും തകർന്നുപോയി. അപകടം നടന്നയുടൻ ലോറി ഡ്രൈവർ വണ്ടി നിർത്തി ഓടി രക്ഷപ്പെട്ടതായി ചിറ്റാപൂർ പോലീസ് അറിയിച്ചു. ഇയാൾക്കായുള്ള തിരച്ചിൽ പോലീസ് ഊർജ്ജിതമാക്കിയിട്ടുണ്ട്.
SUMMARY: Cruiser car collides with lorry in Kalaburagi, Karnataka; Five members of a family die tragically
