ബെംഗളൂരു: വെബ് ടാക്സിയില് യുവതിയെ പീഡിപ്പിക്കാന് ശ്രമിച്ചെന്ന പരാതിയില് കാബ് ഡ്രൈവര് അറസ്റ്റില്. അസം സ്വദേശിനിയായ 27 കാരിയുടെ പരാതിയില് ഐസൂബ് (42) ആണ് അറസ്റ്റിലായത്.
ഈ മാസം 9നു പുലര്ച്ചെ 1.30ന് ആവലഹള്ളിയിയിലാണ് സംഭവം നടന്നത്. എ-നാരായണപുരയില്നിന്ന് താമസ സ്ഥലത്തേക്ക് പോകാന് യുവതി ഓല കാബ് ബുക്ക് ചെയ്തിരുന്നു. എന്നാല് കാബ് യാത്രക്കിടെ റൂട്ട് മാറിയതായി തിരിച്ചറിഞ്ഞ യുവതി ഇത് ചോദ്യംചെയ്തെങ്കിലും ഇത് വഴിപോകാമെന്നു പറഞ്ഞ ഐസൂബ് ആളൊഴിഞ്ഞ സ്ഥലത്ത് കാര് നിര്ത്തി പിന്സീറ്റിലേക്കു കയറി പീഡിപ്പിക്കാന് ശ്രമിക്കുകയായിരുന്നു. ഭര്ത്താവിനെ ഫോണില് വിളിച്ച് വിവരം അറിയിച്ചതോടെ ഇയാള് യുവതിയെ വഴിയില് ഇറക്കിവിടുകയായിരുന്നു. തുടര്ന്നു ഭര്ത്താവ് എമര്ജന്സി നമ്പറില് അറിയിച്ചു. പിന്നീട് പട്രോളിങ് സംഘമെത്തിയാണ് യുവതിയെ വീട്ടിലെത്തിച്ചത്.
യുവതിയുടെ പരാതിയുടെ അടിസ്ഥാനത്തിൽ കേസ് എടുത്ത ആവലഹള്ളി പോലീസ് ഇയാളെ അറസ്റ്റ് ചെയ്തു. സംഭവത്തില് കൂടുതൽ അന്വേഷണം നടന്നുവരികയാണ്.
SUMMARY: Woman assaulted in Web taxi; Cab driver arrested
