കോഴിക്കോട്: എ.എ. റഹീം എംപിക്കെതിരെ സമൂഹമാധ്യമങ്ങളില് വ്യാജ പ്രചാരണം നടത്തിയ സംഭവത്തില് കോണ്ഗ്രസ് പ്രവർത്തകനെതിരെ പോലീസ് കേസ് രജിസ്റ്റർ ചെയ്തു. പേരാമ്പ്ര വള്ളിക്കുന്ന് സ്വദേശിയായ ആദം കുട്ടിക്കെതിരെയാണ് കേസെടുത്തിരിക്കുന്നത്. കെഎസ്ആർടിസി ബസുകളില് സ്ത്രീകള്ക്ക് നല്കുന്ന സൗജന്യയാത്ര ഡിവൈഎഫ്ഐ തടയുമെന്ന തരത്തില് എംപിയുടെ ചിത്രം ഉപയോഗിച്ച് വ്യാജ പ്രചാരണം നടത്തിയതിനാണ് നടപടി.
കലാപാഹ്വാനം നടത്തിയെന്ന കുറ്റത്തിനാണ് ഇയാള്ക്കെതിരെ പോലീസ് കേസെടുത്തിരിക്കുന്നത്. ഈ മാസം 12-നാണ് വിവാദമായ പോസ്റ്റ് പ്രചരിപ്പിച്ചത്. നേരത്തെയും എ.എ. റഹീം എംപിക്കെതിരെ സമാനമായ രീതിയില് വ്യാജപ്രചാരണങ്ങള് നടന്നിരുന്നു. ‘കാഫിർ സ്ക്രീൻഷോട്ട്’ നിർമ്മിക്കാൻ ആഹ്വാനം ചെയ്തത് എംപിയാണെന്ന രീതിയില് നേരത്തെ വ്യാജ പ്രചാരണം നടക്കുകയും, ഇത് സംബന്ധിച്ച് ജിതിൻ ഭാസ്കർ എന്നയാള് മൊഴി നല്കിയെന്ന രീതിയില് വാർത്തകള് വരികയും ചെയ്തിരുന്നു.
കൂടാതെ, ഓപ്പറേഷൻ തൂഫാനെതിരെ റഹീം രംഗത്തെത്തി എന്ന വ്യാജ വാർത്ത പ്രചരിപ്പിച്ചതിന് ശ്രീകാന്ത് പള്ളിത്തോട്ട്, റിയാസ് തത്തോത്ത് എന്നീ ഫേസ്ബുക്ക് അക്കൗണ്ട് ഉടമകള്ക്കെതിരെയും പോലീസ് കേസെടുത്തിട്ടുണ്ട്. തുടർച്ചയായി എംപിക്കെതിരെ വ്യാജ പ്രചാരണങ്ങള് നടക്കുന്ന സാഹചര്യത്തില് നല്കിയ പരാതികളുടെ അടിസ്ഥാനത്തിലാണ് പോലീസിന്റെ നടപടി.
SUMMARY: Case registered against Congress worker over fake Facebook post targeting MP A.A. Rahim.
