ബെംഗളൂരു: കേരളസമാജം ബാംഗ്ലൂര്‍ സൗത്ത് വെസ്റ്റിന്റെ ആഭിമുഖ്യത്തില്‍ കോഴിക്കോട് സങ്കീര്‍ത്തനയുടെ ‘കാലം പറക്കണ്’ നാടകം ബെംഗളൂരു യൂണിവേഴ്‌സിറ്റി ക്യാമ്പസിനകത്തുള്ള ഡോ. അംബേദ്കര്‍ സ്‌കൂള്‍ ഓഫ് എക്കണോമിക്‌സ് ഓഡിറ്റോറിയത്തില്‍ അരങ്ങേറി. നാടകത്തിന്റെ 183-ാമത്തേതും അവസാനത്തേതുമായ അവതരണമായിരുന്നു ഇത്.
മൂന്നാം ക്ലാസ് വിദ്യാര്‍ഥിനിയായ ഉത്തര എന്ന പെണ്‍കുട്ടിയായിരുന്നു നാടകത്തിലെ കേന്ദ്ര കഥാപാത്രമായ ജാനിയെ അവതരിപ്പിച്ചത്. സാമൂഹ്യപ്രസക്തമായ വെര്‍ച്ചല്‍ ഓട്ടിസം എന്നതായിരുന്നു നാടകത്തിന്റെ കഥ. മാതാപിതാക്കളുടെ തിരക്കു മൂലം മൊബൈല്‍ ഫോണിനു അടിമയാകുന്ന പെണ്‍കുട്ടിയും, അവളുടെ സ്വഭാവ വൈകൃതങ്ങളും, അവളെ അതില്‍ നിന്ന് തിരിച്ചു കൊണ്ടുവരുന്നതും വളരെ മനോഹരമായി കോഴിക്കോട് സങ്കീര്‍ത്തനയുടെ കലാകാരന്മാര്‍ അവതരിപ്പിച്ചു. നാടുകത്തിന് ശേഷം സദസ് നിറഞ്ഞ കൈയ്യടിയോടെ കലാകാരന്മാരെ അഭിനന്ദിച്ചു.
നാടകത്തിലെ കലാകാരന്മാരെയും അണിയറ പ്രവര്‍ത്തകരെയും കേരളസമാജം ബെംഗളൂരു സൗത്ത് വെസ്റ്റ് പ്രസിഡണ്ട് അഡ്വ. പ്രമോദ് വരപ്രത്ത് പൊന്നാട അണിയിച്ച് ആദരിച്ചു. പി പ്രദീപ്, സജിത് കുമാര്‍, ജഗത് എം ജി, ശിവദാസ്, രാജേഷ് എന്‍ കെ ,ടി ജെ തോമസ്, പ്രവീണ്‍ എന്‍ പി, ശിവപ്രസാദ് എന്നിവര്‍ നേതൃത്വം നല്‍കി.
📷 കേരളസമാജം ബാംഗ്ലൂര്‍ സൗത്ത് വെസ്റ്റ് ഭാരവാഹികള്‍ നാടകപ്രവര്‍ത്തകരോടൊപ്പം
