ബെംഗളൂരു: രാജാജിനഗർ നമ്മ മെട്രോ സ്റ്റേഷനിൽ യുവതി ട്രാക്കിലേക്ക് ചാടിയതിനെ തുടർന്ന് ഗ്രീൻ ലൈനിലെ മെട്രോ സർവീസ് തടസ്സപ്പെട്ടു. ശനിയാഴ്ച ഉച്ചയ്ക്ക് 12.25 ഓടെയാണ് സംഭവം. ട്രെയിനിന് മുന്നിലുള്ള ട്രാക്കിലേക്ക് യുവതി ചാടുന്നത് കണ്ടപ്പോൾ, ജാഗ്രത പാലിച്ച ട്രെയിൻ ഡ്രൈവർ ഉടൻ തന്നെ ബ്രേക്ക് പ്രയോഗിക്കുകയും എമർജൻസി ട്രിപ്പ് സിസ്റ്റം (ഇടിഎസ്) സജീവമാക്കുകയും ചെയ്തതിനെ തുടർന്ന് യാത്രക്കാരിയെ പരുക്കുകളില്ലാതെ സുരക്ഷിതമായി രക്ഷപ്പെടുത്തിയതായി ഉദ്യോഗസ്ഥർ പറഞ്ഞു.
സംഭവത്തെത്തുടർന്ന് മെട്രോ സർവീസുകൾ ഏകദേശം 10 മിനിറ്റ് വൈകി. ട്രാക്ക് പരിശോധനയ്ക്ക് ശേഷം എല്ലാ സുരക്ഷാ പ്രോട്ടോക്കോളുകളും പൂർത്തിയാക്കി ഉച്ചയ്ക്ക് 12:34 ന് സര്‍വീസ് പുനരാരംഭിച്ചതായി ബിഎംആർസിഎൽ അധികൃതര്‍ പറഞ്ഞു. എന്നാൽ, അവരുടെ ആരോഗ്യനിലയെയോ ട്രാക്കിലേക്ക് ചാടാൻ ഇടയായ കാരണത്തെയോ കുറിച്ച് അധികൃതർ ഔദ്യോഗികമായി പുറത്തുവിട്ടിട്ടില്ല. സംഭവത്തിൽ പോലീസ് അന്വേഷണം ആരംഭിച്ചിട്ടുണ്ട്. സംഭവത്തിന്റെ സാഹചര്യങ്ങളും യുവതി ട്രാക്കിലേക്ക് എത്താനുണ്ടായ കാരണങ്ങളും വിശദമായി പരിശോധിച്ചുവരികയാണെന്ന് അന്വേഷണ ഉദ്യോഗസ്ഥർ അറിയിച്ചു.
SUMMARY: Woman jumps onto metro tracks; Green Line service temporarily disrupted
