ബെംഗളൂരു: ബെംഗളൂരു–അരസീകെരെ റൂട്ടിൽ പുതിയ മെമു ട്രെയിൻ സർവീസ് ആരംഭിക്കാൻ റെയിൽവേ ബോർഡ് അനുമതി നൽകി. ജൂലൈ 14 മുതൽ ട്രെയിൻ സ്ഥിരം സർവീസ് ആരംഭിക്കും. ഉദ്ഘാടന പ്രത്യേക സർവീസ് ജൂലൈ 13-ന് നടത്തും.
പുതിയ ട്രെയിൻ യെലഹങ്ക–അരസീകെരെ, ട്രെയിൻ നമ്പർ 66505, അരസീകെരെ–യെലഹങ്ക, ട്രെയിൻ നമ്പർ 66506 എന്നീ നമ്പറുകളിലാണ് സർവീസ് നടത്തുക.
ഞായർ ഒഴികെ ആഴ്ചയിൽ ആറു ദിവസമാണ് ഇരുവശത്തേക്കും ട്രെയിൻ സർവീസ് നടത്തുക. യെലഹങ്കയിൽ നിന്നും എല്ലാദിവസവും രാവിലെ 6:45 നു പുറപ്പെടുന്ന ട്രെയിൻ അരസീകെരെ ജംഗ്ഷനിൽ രാവിലെ 11 മണിക്ക് എത്തിച്ചേരും. അരസീകെരെ ജംഗ്ഷനിൽ നിന്ന് നിന്ന് ഉച്ചക്ക് 2.10 ന് പുറപ്പെടുന്ന ട്രെയിൻ വൈകുന്നേരം 7. 15ന് യെലഹങ്കയിൽ എത്തിച്ചേരും.
ആദിഹള്ളി, ഹൊന്നവല്ലി റോഡ്, ശ്രീ ശാരദ നഗർ, തിപ്റ്റൂർ, ബനശങ്കരി ഹാൾട്ട്, കർദി, അരേളഗുപ്പേ, ബാണസാന്ദ്ര, അമ്മസാന്ദ്ര, സാമ്പിഗെ റോഡ്, നിട്ടൂർ, ഗുബ്ബി, മല്ലസാന്ദ്ര, ഹെഗ്ഗേരെ ഹാള്‍ട്ട്, തുമകുരു, ക്യാത്തസാന്ദ്ര, ഹിരേഹള്ളി, ദോബ്‌സ്‌പേട്ട്, നിദ്വന്ദ, മുദ്ദലിംഗനഹള്ളി, ദോഡ്ബെലെ, ഭൈരനായകനഹള്ളി, ഗൊല്ലഹള്ളി, ചിക്കബാനവര, യശ്വന്ത്പൂർ എന്നി സ്റ്റേഷനുകളിൽ സ്റ്റോപ്പ്‌ അനുവദിച്ചിട്ടുണ്ട്.
ബെംഗളൂരു അർബൻ, ബെംഗളൂരു റൂറൽ, തുംകൂരു, ഹാസൻ ജില്ലകളിലെ യാത്രക്കാർക്ക് ഇത് വലിയ ആശ്വാസമാകും. ദിവസേന ജോലിക്കും പഠനത്തിനുമായി യാത്ര ചെയ്യുന്നവർക്കും ചെറുകിട വ്യാപാരികൾക്കും പുതിയ മെമു ട്രെയിൻ ഏറെ പ്രയോജനകരമാകുമെന്നാണ് റെയിൽവേയുടെ വിലയിരുത്തൽ.
SUMMARY: New MEMU train from Bengaluru to Arasekere from July 14 will benefit passengers in four districts
