ബെംഗളൂരു: കാലവര്ഷം ശക്തിപ്രാപിച്ചതോടെ കര്ണാടകയില് വൈറല് പനിയുടെയും ഇന്ഫ്ലുവന്സയുടെയും(ഫ്ലൂ) കേസുകള് വര്ധിക്കുന്നതായി ആരോഗ്യവകുപ്പ് അറിയിച്ചു. രോഗവ്യാപനം നിയന്ത്രിക്കുന്നതിനായി സംസ്ഥാനത്തുടനീളം രോഗനിരീക്ഷണം ശക്തമാക്കിയതായും ആരോഗ്യ അധികൃതര് വ്യക്തമാക്കി.
ബെംഗളൂരു ഉള്പ്പെടെയുള്ള നഗരപ്രദേശങ്ങളില് കഴിഞ്ഞ ദിവസങ്ങളായി പനി, ചുമ, തൊണ്ടവേദന, ശരീരവേദന തുടങ്ങിയ ലക്ഷണങ്ങളുമായി ആശുപത്രികളിലെത്തുന്നവരുടെ എണ്ണം വര്ധിച്ചതായി ഡോക്ടര്മാര് പറയുന്നു. കാലവര്ഷത്തിലെ ഈര്പ്പമുള്ള കാലാവസ്ഥ വൈറല് രോഗങ്ങള് പകരാന് അനുകൂല സാഹചര്യമൊരുക്കുന്നതാണ് പ്രധാന കാരണമെന്ന് ആരോഗ്യവിദഗ്ധര് വിലയിരുത്തുന്നു.
സര്ക്കാര് ആശുപത്രികളിലും സ്വകാര്യ ആശുപത്രികളിലും രോഗനിരീക്ഷണം ശക്തമാക്കിയിട്ടുണ്ട്. പനി ലക്ഷണങ്ങള് അനുഭവപ്പെടുന്നവര് സ്വയം മരുന്ന് കഴിക്കുന്നതിന് പകരം ഡോക്ടറെ സമീപിക്കണമെന്നും, കുട്ടികള്, വയോധികര്, ഗര്ഭിണികള്, മറ്റ് ഗുരുതര രോഗങ്ങളുള്ളവര് എന്നിവര് പ്രത്യേക ജാഗ്രത പാലിക്കണമെന്നും ആരോഗ്യവകുപ്പ് നിര്ദേശിച്ചു.
കൈകള് ഇടയ്ക്കിടെ സോപ്പുപയോഗിച്ച് കഴുകുക, ചുമയ്ക്കുമ്പോഴും തുമ്മുമ്പോഴും വായും മൂക്കും മൂടുക, രോഗലക്ഷണങ്ങള് ഉള്ളവര് തിരക്കേറിയ സ്ഥലങ്ങള് ഒഴിവാക്കുക, ആവശ്യമായ വിശ്രമവും വെള്ളവും ഉറപ്പാക്കുക തുടങ്ങിയ മുന്കരുതലുകള് പാലിക്കണമെന്നും അധികൃതര് അഭ്യര്ഥിച്ചു. സ്ഥിതി നിയന്ത്രണവിധേയമാണെങ്കിലും രോഗവ്യാപനം സൂക്ഷ്മമായി നിരീക്ഷിച്ചുവരികയാണെന്നും ആരോഗ്യവകുപ്പ് അറിയിച്ചു.
SUMMARY: Fever cases increase with monsoon; Karnataka Health Department tightens surveillance
