കൊച്ചി: നീറ്റ് പരീക്ഷാ ക്രമക്കേടുകൾക്കെതിരെ കോക്രോച്ച് ജനതാ പാർട്ടി നേതൃത്വം നൽകുന്ന വിദ്യാർത്ഥി പ്രക്ഷോഭം ശക്തമാകുന്നതിനിടെ യുവാക്കൾക്ക് പിന്തുണയർപ്പിച്ച് മെഗാസ്റ്റാർ മമ്മൂട്ടി. യുവതലമുറയുടെ ശബ്ദത്തിന് പ്രാധാന്യം നൽകണമെന്ന് ഫേസ്ബുക്കിൽ പങ്കുവെച്ച സന്ദേശത്തിൽ മമ്മൂട്ടി ആവശ്യപ്പെട്ടു.
‘യുവാക്കളാണ് നമ്മുടെ രാജ്യത്തിന്റെ യഥാർഥ സമ്പത്ത്. അവരെ കേൾക്കണം, സംരക്ഷിക്കണം, കരുത്തേകണം’-മമ്മൂട്ടി കുറിച്ചു.
വിദ്യാഭ്യാസ മേഖലയിലെ വിവിധ വിഷയങ്ങളും ചോദ്യപേപ്പർ ചോർച്ച ആരോപണങ്ങളും ഉയർത്തി ഡൽഹി ജന്തർ മന്തറിലടക്കം വിദ്യാർഥികളും സി.ജെ.പി പ്രവർത്തകരും നടത്തിവരുന്ന പ്രതിഷേധങ്ങൾ രാജ്യശ്രദ്ധ നേടുന്നതിനിടയിലാണ് മമ്മൂട്ടിയുടെ പ്രതികരണം. താരത്തിന്റെ പോസ്റ്റ് സോഷ്യൽ മീഡിയയിൽ നിമിഷനേരം കൊണ്ട് ശ്രദ്ധ നേടുകയും വ്യാപകമായി പങ്കുവെക്കപ്പെടുകയും ചെയ്യുന്നുണ്ട്. നേരത്തെ മമ്മൂട്ടിയുടെ മകനും നടനുമായ ദുൽഖർ സൽമാനും വിദ്യാർഥി പ്രക്ഷോഭത്തിന് പിന്തുണയുമായെത്തിയിരുന്നു.
നടൻമാരായ ടൊവിനോ തോമസ്, ഇന്ദ്രജിത്ത് സുകുമാരൻ, കുഞ്ചാക്കോ ബോബൻ, കാളിദാസ് ജയറാം, ജോർജു ജോർജ്, നടിമാരായ പാർവതി തിരുവോത്ത്, റിമ കല്ലിങ്കൽ, നിഖില വിമൽ, വിസ്മയ മോഹൻലാൽ എന്നിവരും വിദ്യാർഥി പ്രക്ഷോഭത്തെ പിന്തുണച്ച് സോഷ്യൽ മീഡിയയിൽ കുറിപ്പുകൾ പങ്കുവെച്ചിരുന്നു. ഭിന്നിപ്പുകളിലൂടേയും ആക്രമണങ്ങളിലൂടെയുമല്ല, മറിച്ച സഹാനുഭൂതിയിലൂടെയാണ് കരുത്തുറ്റ ഭാവി കെട്ടിപ്പടുക്കേണ്ടത് എന്നാണ് ദുൽഖർ കുറിച്ചത്.
SUMMARY: ‘Youth are the true treasure of the nation’: Mammootty supports student protest in Delhi
