തിരുവനന്തപുരം: കെ.എസ്.ആർ.ടി.സി ‘പ്രിയദർശിനി’ സർവീസുകളിലെ വനിതാ യാത്രക്കാർക്കുള്ള സൗജന്യ ‘സീറോ വാല്യു’ ടിക്കറ്റിന്റെ പേരില്‍ വൻ സാമ്പത്തിക തട്ടിപ്പ് നടത്തിയ മൂന്ന് കണ്ടക്ടർമാർക്ക് നോട്ടീസ് അയച്ചു. വനിതകള്‍ക്കുള്ള ടിക്കറ്റ് പുരുഷന്മാർക്ക് നല്‍കി യാത്രക്കാരില്‍ നിന്ന് തുക കൈപ്പറ്റി സ്വന്തം പോക്കറ്റിലാക്കിയതിനാണ് നടപടി. ബസുകളില്‍ നടത്തിയ പരിശോധനയിലാണ് ഈ വൻ ക്രമക്കേട് കണ്ടെത്തിയത്.
സ്ത്രീകള്‍ക്ക് നല്‍കുന്ന സീറോ വാല്യൂ ടിക്കറ്റുകളുടെ തുക സംസ്ഥാന സർക്കാരാണ് കെ.എസ്.ആർ.ടി.സിക്ക് നല്‍കുന്നത്. ഈ അവസരം മുതലെടുത്ത് ചില ജീവനക്കാർ പുരുഷന്മാർക്ക് സീറോ ടിക്കറ്റ് നല്‍കുകയും, അവരില്‍ നിന്ന് വാങ്ങുന്ന ടിക്കറ്റ് തുക സർക്കാരിലേക്ക് അടയ്ക്കാതെ സ്വന്തമാക്കുകയുമായിരുന്നു. ടിക്കറ്റ് പരിശോധിക്കാതെ വാങ്ങി വെയ്ക്കുന്ന യാത്രികരായിരുന്നു ഇവരുടെ ഇരകള്‍. ആരെങ്കിലും തട്ടിപ്പ് ചോദ്യം ചെയ്താല്‍ അബദ്ധം പറ്റിയതാണെന്ന് പറഞ്ഞ് ഒഴിഞ്ഞ് മാറുകയും പകരം പുതിയ ടിക്കറ്റ് നല്‍കുകയുമാണ് രീതി.
SUMMARY: Zero-fare’ tickets for men on Priyadarshini buses; notices issued to three conductors
