ബെംഗളൂരു: ഭക്ഷ്യവിതരണ പ്ലാറ്റ്ഫോമുകളായ സ്വിഗ്ഗിയും സൊമാറ്റോയും ഈടാക്കുന്ന ഉയർന്ന കമ്മീഷൻ, നിർബന്ധിത ഡിസ്കൗണ്ടുകൾ, പേയ്മെന്റ് കിഴിവുകൾ എന്നിവയിൽ പ്രതിഷേധിച്ച് ഓഗസ്റ്റ് 15 മുതൽ ഈ പ്ലാറ്റ്ഫോമുകളിലൂടെയുള്ള ഓർഡറുകൾ നിർത്തിവെക്കുമെന്ന് ബെംഗളൂരുവിലെ ഹോട്ടൽ-റസ്റ്റോറന്റ് സംഘടനകൾ മുന്നറിയിപ്പ് നൽകി.
നിലവിലെ കമ്മീഷൻ നിരക്കുകളും മറ്റ് സാമ്പത്തിക വ്യവസ്ഥകളും ചെറുകിട-ഇടത്തരം ഭക്ഷണശാലകളുടെ പ്രവർത്തനത്തെ പ്രതികൂലമായി ബാധിക്കുന്നുണ്ടെന്ന് സംഘടനകള് ചൂണ്ടിക്കാട്ടുന്നു. വിഷയത്തിൽ ഓഗസ്റ്റ് 15-നകം രേഖാമൂലമുള്ള പരിഹാരവും നടപടിയും സ്വീകരിക്കണമെന്ന് സംഘടനകൾ സ്വിഗ്ഗിക്കും സൊമാറ്റോയ്ക്കും ആവശ്യപ്പെട്ടിട്ടുണ്ട്.
നിശ്ചിത സമയത്തിനുള്ളിൽ പ്രശ്നപരിഹാരം ഉണ്ടായില്ലെങ്കിൽ ബെംഗളൂരുവിലെ നിരവധി റെസ്റ്റോറന്റുകൾ ഈ പ്ലാറ്റ്ഫോമുകളിൽ നിന്ന് താൽക്കാലികമായി പിന്മാറാൻ സാധ്യതയുണ്ടെന്നാണ് സംഘടനകളുടെ മുന്നറിയിപ്പ്. ഇത് നടപ്പായാൽ നഗരത്തിലെ ഓൺലൈൻ ഭക്ഷ്യവിതരണ മേഖലയെ കാര്യമായി ബാധിക്കാനിടയുണ്ട്.
SUMMARY: Bengaluru hotel and restaurant owners say they will boycott Swiggy and Zomato from August 15
