കാഠ്മണ്ഡു: നേപ്പാളില് മിന്നല് പ്രളയത്തെ തുടർന്ന് നിർമാണത്തിലിരുന്ന തുരങ്കത്തില് കുടുങ്ങിയ തൊഴിലാളികളില് ആറ് പേരുടെ മൃതദേഹങ്ങള് സുരക്ഷാസേന കണ്ടെത്തി. ഹിമാനി വീണതിനെ തുടർന്ന് ഉണ്ടായ പ്രളയത്തില് വെള്ളവും ചെളിയും തുരങ്കത്തിനുള്ളിലേക്ക് ഇരച്ചുകയറിയാണ് തൊഴിലാളികള് അപകടത്തില്പ്പെട്ടത്.
അപ്പർ ത്രിശൂലി-1 ജലവൈദ്യുത പദ്ധതിയുടെ ഓഡിറ്റ്-3 തുരങ്കത്തില് നിന്നാണ് നേപ്പാള് സൈന്യവും മറ്റ് സുരക്ഷാസേനാ വിഭാഗങ്ങളും ചേർന്നുള്ള സംഘം മൃതദേഹങ്ങള് പുറത്തെടുത്തത്. കോണ്ക്രീറ്റ് ജോലികള്ക്കായി തുരങ്കത്തിനുള്ളില് സ്ഥാപിച്ചിരുന്ന സ്റ്റീല് റീഇൻഫോഴ്സ്മെന്റ് മെഷില് കുടുങ്ങിയ നിലയിലായിരുന്നു മൃതദേഹങ്ങള്.
ഗ്രൈൻഡറുകള്, ഗ്യാസ് കട്ടറുകള്, റോട്ടറി റെസ്ക്യൂ ഉപകരണങ്ങള് എന്നിവ ഉപയോഗിച്ചാണ് സ്റ്റീല് ഘടനകള് നീക്കി മൃതദേഹങ്ങള് പുറത്തെടുത്തതെന്ന് നേപ്പാള് സൈന്യം അറിയിച്ചു. നേപ്പാള്-ടിബറ്റ് അതിർത്തിക്ക് സമീപം ഓഗസ്റ്റ് 26ന് ഉണ്ടായ ഹിമപാതത്തെ തുടർന്നാണ് ഭോട്ടെകോശി നദിയില് ശക്തമായ വെള്ളപ്പൊക്കമുണ്ടായത്.
ദുരന്തത്തില് 1,410 പേർ മരിക്കുകയും 6,145 പേരെ കാണാതാവുകയും ചെയ്തതായാണ് കണക്ക്. ദുരിതബാധിത മേഖലകളില് നിന്ന് ഇതുവരെ 13,756ലധികം പേരെ രക്ഷപ്പെടുത്തിയിട്ടുണ്ട്. ദുരന്തത്തെ തുടർന്ന് തകർന്ന ഗതാഗത സംവിധാനങ്ങള് പുനഃസ്ഥാപിക്കുന്നതിനുള്ള പ്രവർത്തനങ്ങള് പുരോഗമിക്കുന്നതിനിടയിലും തുരങ്കത്തിനുള്ളിലെ രക്ഷാപ്രവർത്തനവും തിരച്ചിലും തുടരുകയാണ്.
SUMMARY: Nepal flash floods: Six more bodies recovered
