ബെംഗളൂരു: ദക്ഷിണേന്ത്യയിലെ ഏറ്റവും വലിയ അക്ഷരോത്സവമായ ബുക്ക് ബ്രഹ്മ സാഹിത്യോത്സവത്തിന്റെ മൂന്നാമത് എഡിഷന് ഓഗസ്റ്റ് 14ന് ബെംഗളൂരു കോറമംഗല സെന്റ് ജോണ്സ് ഓഡിറ്റോറിയത്തില് തുടക്കമാകും. പത്ത് ദിവസം നീണ്ടു നില്ക്കുന്ന സാഹിത്യോത്സവത്തല് 14 മുതല് 20 വരെയുള്ള ആദ്യ ഏഴ് ദിവസങ്ങളില് വിവിധ കലാ-സംഗീത പരിപാടികള് അരങ്ങേറും. പുസ്തകമേളയാണ് ഇത്തവണത്തെ മറ്റൊരു സവിശേഷത. രാജ്യത്തെ വിവിധ പ്രസാധകരുടെ ശ്രദ്ധേയമായ പുസ്തകങ്ങള് മേളയില് ലഭ്യമാകും. ഇതിനു പുറമേ ഫ്ലീ & ഹാൻഡിക്രാഫ്റ്റ്സ് മാർക്കറ്റ് എന്നിവയുമുണ്ട്.
പ്രധാന പരിപാടിയായ സാഹിത്യോത്സവം ഓഗസ്റ്റ് 21 മുതല് 23 വരെ നടക്കും. ഇന്ത്യയുടെ വിവിധ ഭാഗങ്ങളില് നിന്നുള്ള എഴുത്തുകാരും വായനക്കാരും ചിന്തകരും മൂന്ന് ദിവസങ്ങളിലായി സംവാദങ്ങള്ക്കും ചര്ച്ചകള്ക്കുമായി ഒന്നിച്ചുകൂടും. 9 വ്യത്യസ്ത വേദികളിലായി 200-ലധികം ക്യൂറേറ്റഡ് സെഷനുകള് നടക്കും. 400-ലധികം എഴുത്തുകാര്, കലാകാരന്മാര്, പ്രസാധകര്, വിവിധ വിഷയവിദഗ്ധര് എന്നിവര് കന്നഡ, തെലുങ്ക്, തമിഴ്, മലയാളം, ഇംഗ്ലീഷ് ഭാഷകളെ പ്രതിനിധീകരിച്ച് പങ്കെടുക്കും. സാഹിത്യം, സമൂഹം, സംസ്കാരം, വിവര്ത്തനം, പ്രസാധനം, കല തുടങ്ങിയ വിഷയങ്ങളിലായിരിക്കും സംവാദങ്ങള്.
മലയാളത്തില് നിന്നും എന്.എസ് മാധവന്, സക്കറിയ, കെ. ആര് മീര, ബെന്ന്യാമിന്, ഇ.പി രാജഗോപാലന്, കെ. പി രാമനുണ്ണി, സുധാകരന് രാമന്തളി, സന്തോഷ് ഏച്ചിക്കാനം പി വി ഷാജികുമാര്, ലിപിന് രാജ്, എം. കെ ഹരികുമാര്, ജേക്കബ് എബ്രഹാം ഉള്പ്പെടെയുള്ളവര് പങ്കെടുക്കുന്നുണ്ട്. കൂടാതെ ബെംഗളൂരുവില് നിന്നുള്ള മലയാളി എഴുത്തുകാരും സാഹിത്യവിരുന്നിന്റെ ഭാഗമാകും. പ്രഭാഷകരുടെ പൂര്ണ്ണ പട്ടികയും പരിപാടികളുടെ വിശദാംശങ്ങളും www.bookbrahmalitfest.com-ല് ലഭ്യമാണ്.
സാഹിത്യോത്സവത്തോടനുബന്ധിച്ച സാംസ്കാരിക പരിപാടികള്
ഓഗസ്റ്റ് 21
വൈകിട്ട് 6.30 മുതല്
ചലച്ചിത്രസംവിധായകന് നടേഷ് ഹെഗ്ഡെയുമായുള്ള സംവാദം. തുടര്ന്ന് അദ്ദേഹത്തിന്റെ പ്രശസ്ത ചിത്രമായ ‘വാഗാചിപാനി’യുടെ പ്രത്യേക പ്രദര്ശനം
ഓഗസ്റ്റ് 22
രാവിലെ 8.30 മുതല് 9.50 വരെ
സിത്താര് സംഗീതക്കച്ചേരി – റാഫി ഖാന് & ഷാഫി ഖാന്
വൈകിട്ട് 6.30 മുതല് 8.30 വരെ
കര്ണാടക സംഗീതക്കച്ചേരി – ടി. എസ്. സത്യവതിയും സംഘവും
ഓഗസ്റ്റ് 23
രാവിലെ 8.30 മുതല് 9.50 വരെ
ഹിന്ദുസ്ഥാനി ശാസ്ത്രീയ സംഗീതക്കച്ചേരി – അനിരുദ്ധ് ഐത്താള്യും സംഘവും
വൈകിട്ട് 6.30 മുതല് 9.30 വരെ
യക്ഷഗാന അവതരണം. പട്ല സതീഷ് ഷെട്ടിയുടെ നേതൃത്വത്തില് ശ്രീ ജ്ഞാനശക്തി സുബ്രഹ്മണ്യസ്വാമി കൃപാപോഷിത യക്ഷഗാന സംഘം
പത്ത് ദിവസങ്ങളിലായി നടക്കുന്ന എല്ലാ സാഹിത്യസെഷനുകള്ക്കും, സാംസ്കാരിക പരിപാടികള്ക്കും, പ്രദര്ശനങ്ങള്ക്കും, ചര്ച്ചകള്ക്കും പ്രവേശനം പൂര്ണമായും സൗജന്യമാണ്. പങ്കെടുക്കാന് ആഗ്രഹിക്കുന്നവര് www.bookbrahmalitfest.com വഴി രജിസ്റ്റര് ചെയ്യാവുന്നതാണ്. ഓണ്ലൈനായി രജിസ്റ്റര് ചെയ്യാത്തവര്ക്കും വേദിയിലെ രജിസ്ട്രേഷന് കൗണ്ടറില് നിന്ന് പ്രവേശന പാസ് ലഭ്യമാകും.
SUMMARY: Book Brahma Literary Festival; The 10-day long Akshorotsavam will begin on August 14,
