ബെംഗളൂരു: കർണാടകയിൽ വീണ്ടും മഴ ശക്തമാകാൻ സാധ്യതയെന്ന് കാലാവസ്ഥാ വകുപ്പ്. സെപ്റ്റംബർ 19 മുതൽ 21 വരെ സംസ്ഥാനത്തിന്റെ വിവിധ ഭാഗങ്ങളിൽ ഇടിമിന്നലോടുകൂടിയ മഴയ്ക്കും ശക്തമായ കാറ്റിനും സാധ്യതയുണ്ട്. സെപ്റ്റംബർ 20, 21 തീയതികളിൽ സംസ്ഥാനത്തെ ചില മേഖലകളിൽ ശക്തമായ മഴയ്ക്ക് മുന്നറിയിപ്പുണ്ട്.
തീരദേശ കർണാടകയിലും വടക്കൻ, തെക്കൻ ഉൾനാടൻ കർണാടകയിലും ഈ തീയതികളിൽ ശക്തമായ മഴയ്ക്ക് സാധ്യതയുണ്ടെന്നാണ് കേന്ദ്ര കാലാവസ്ഥാ വകുപ്പിന്റെ മുന്നറിയിപ്പ്. ചിലയിടങ്ങളിൽ ഇടിമിന്നലിനും ശക്തമായ കാറ്റിനും സാധ്യതയുള്ളതിനാൽ ജനങ്ങൾ ജാഗ്രത പാലിക്കണമെന്ന് അധികൃതർ നിർദേശിച്ചു. തുടർ ദിവസങ്ങളിൽ നഗരത്തിൽ ഒന്നോ രണ്ടോ ഘട്ടങ്ങളിലായി മഴയോ ഇടിയോടുകൂടിയ മഴയോ ഉണ്ടാകാമെന്നാണ് കാലാവസ്ഥാ വകുപ്പിന്റെ പ്രവചനം
കഴിഞ്ഞ ദിവസങ്ങളിലുണ്ടായ ശക്തമായ മഴയിൽ ബെംഗളൂരുവിലെ നിരവധി പ്രദേശങ്ങളിൽ വെള്ളക്കെട്ടും ഗതാഗതക്കുരുക്കും അനുഭവപ്പെട്ടിരുന്നു. നഗരത്തിൽ ശരാശരി 55 മില്ലിമീറ്റർ വരെ മഴ രേഖപ്പെടുത്തിയപ്പോൾ കൊറമംഗലയിൽ 70 മില്ലിമീറ്റർ മഴ ലഭിച്ചിരുന്നു. ചിക്ക്പേട്ട്, ഹെബ്ബാൾ, മഡിവാള, ഇന്ദിരാനഗർ തുടങ്ങിയ മേഖലകളിലും വെള്ളക്കെട്ട് റിപ്പോർട്ട് ചെയ്തിരുന്നു.
തുടർച്ചയായ മഴയുടെ പശ്ചാത്തലത്തിൽ താഴ്ന്ന പ്രദേശങ്ങളിൽ താമസിക്കുന്നവർ ജാഗ്രത പാലിക്കണമെന്നും വാഹനമോടിക്കുന്നവർ വെള്ളക്കെട്ടുള്ള റോഡുകളിൽ പ്രത്യേക ശ്രദ്ധ പുലർത്തണമെന്നും അധികൃതർ നിർദേശിച്ചു. ഇടിമിന്നലുള്ള സമയത്ത് മരങ്ങൾക്കും വൈദ്യുതി ലൈനുകൾക്കും സമീപം നിൽക്കുന്നത് ഒഴിവാക്കണമെന്നും മുന്നറിയിപ്പുണ്ട്.
SUMMMARY: Rain intensifies again in Karnataka; yellow alert for 17 districts.
