ബെംഗളൂരു: ബെംഗളൂരു റൂറൽ ജില്ലയിലെ ദൊഡ്ഡബള്ളാപുര താലൂക്കിൽ വെള്ളിയാഴ്ച രാവിലെ 3.0 തീവ്രതയുള്ള നേരിയ ഭൂചലനം രേഖപ്പെടുത്തി. തൂബഗെരെ ഗ്രാമപഞ്ചായത്ത് പരിധിയിലെ തിമ്മോജനഹള്ളി ഗ്രാമത്തിന് സമീപമാണ് പ്രഭവകേന്ദ്രം. രാവിലെ 9.01-ഓടെ ഉണ്ടായ ഭൂചലനം ഭൂമിയുടെ ഏകദേശം 10 കിലോമീറ്റർ ആഴത്തിലാണ് സംഭവിച്ചതെന്ന് കർണാടക സംസ്ഥാന പ്രകൃതിദുരന്ത നിരീക്ഷണ കേന്ദ്രം അറിയിച്ചു. ഭൂചലനത്തിന്റെ തീവ്രത കുറവായതിനാൽ പ്രദേശവാസികൾ ആശങ്കപ്പെടേണ്ട സാഹചര്യമില്ലെന്നാണ് അധികൃതരുടെ വിലയിരുത്തൽ.
കെ.എസ്.എൻ.ഡി.എം.സി.യുടെ റിപ്പോർട്ട് പ്രകാരം തിമ്മോജനഹള്ളി ഗ്രാമത്തിൽനിന്ന് ഏകദേശം 500 മീറ്റർ വടക്കുഭാഗത്താണ് ഭൂചലനത്തിന്റെ പ്രഭവകേന്ദ്രം. നരഗാനഹള്ളി, തൂബഗെരെ, കർണാല എന്നിവിടങ്ങളും പ്രഭവകേന്ദ്രത്തിന് സമീപത്താണ്.
ഭൂചലനത്തിന്റെ പ്രകമ്പനം പ്രഭവകേന്ദ്രത്തിൽനിന്ന് 20 മുതൽ 30 കിലോമീറ്റർ വരെ ചുറ്റളവിലുള്ള പ്രദേശങ്ങളിൽ അനുഭവപ്പെട്ടിരിക്കാമെന്നാണ് അധികൃതരുടെ വിലയിരുത്തൽ. എന്നാൽ സമീപപ്രദേശങ്ങളിലെല്ലാം പ്രകമ്പനം അനുഭവപ്പെട്ടതായി സ്ഥിരീകരിച്ചിട്ടില്ല.
പ്രഭവകേന്ദ്രം ഭൂകമ്പ സാധ്യത താരതമ്യേന കുറഞ്ഞ സീസ്മിക് സോൺ രണ്ടിലാണ് ഉൾപ്പെടുന്നതെന്ന് കെ.എസ്.എൻ.ഡി.എം.സി. വ്യക്തമാക്കി. ഭൂചലനത്തിന്റെ തീവ്രതയും അനുബന്ധ സാഹചര്യങ്ങളും വിലയിരുത്തിയതിന്റെ അടിസ്ഥാനത്തിൽ പ്രാദേശിക ജനജീവിതത്തിനോ കെട്ടിടങ്ങൾക്കോ വലിയ നാശമുണ്ടാക്കാൻ സാധ്യതയില്ലെന്നാണ് കേന്ദ്രത്തിന്റെ നിഗമനം.ഭൂചലനത്തെ തുടർന്ന് ആളപായമോ കെട്ടിടങ്ങൾക്ക് നാശനഷ്ടമോ ഉണ്ടായതായി ഔദ്യോഗികമായി സ്ഥിരീകരിച്ച വിവരങ്ങളില്ല.
ഭൂചലനസമയത്ത് വീടിനുള്ളിലാണെങ്കിൽ ഉറപ്പുള്ള മേശയ്ക്കടിയിൽ അഭയം തേടുകയും തലയും കഴുത്തും സംരക്ഷിക്കുകയും വേണം. ജനാലകൾ, ഗ്ലാസ് വസ്തുക്കൾ, വീഴാൻ സാധ്യതയുള്ള അലമാരകൾ എന്നിവയിൽനിന്ന് അകന്നുനിൽക്കണം. പുറത്താണെങ്കിൽ കെട്ടിടങ്ങൾ, വൈദ്യുതിത്തൂണുകൾ, മേൽവൈദ്യുതിക്കമ്പികൾ എന്നിവയിൽനിന്ന് അകന്ന് തുറസ്സായ സ്ഥലത്തേക്ക് മാറണം.
SUMMARY: Mild earthquake near Doddaballapura; intensity 3.0
