ചേരാനല്ലൂർ: കൊച്ചി ചേരാനല്ലൂരിൽ അമിതവേഗത്തിലെത്തിയ ബെൻസ് കാറിടിച്ച് സ്കൂട്ടർ യാത്രികൻ മരിച്ച സംഭവത്തിൽ പ്രതിയായ പതിനേഴുകാരനെതിരെ നരഹത്യാക്കുറ്റം ചുമത്തി പോലീസ്. നേരത്തെ ബിഎൻഎസ് 281 വകുപ്പു പ്രകാരം ജാമ്യം ലഭിക്കാവുന്ന വകുപ്പുകളാണ് ചുമത്തിയിരുന്നത്. ഇത് അനുസരിച്ച് പ്രതിക്ക് സ്റ്റേഷൻ ജാമ്യം നൽകിയിരുന്നു. എന്നാൽ, ഇപ്പോൾ ബിഎൻഎസ് 105 വകുപ്പ് (നരഹത്യാ കുറ്റം) പ്രകാരം, ജാമ്യമില്ലാ വകുപ്പുകൾകൂടി ചുമത്തിയതോടെ പ്രതിയെ പൊലീസ് വീണ്ടും കസ്റ്റഡിയിലെടുക്കും. അഡീഷണൽ ജഡ്ജിയുടെ മകനാണ് പതിനേഴുകാരനായ പ്രതി.
കുട്ടി ഓടിച്ച വാഹനത്തിന്റെ ആര്‍ സി ഉടമ പിതാവായ ജഡ്ജിയാണ്. മകന്‍ വാഹനമെടുത്ത് പോയതിനെ കുറിച്ച് തനിക്കറിയില്ലെന്നാണ് പിതാവ് പോലീസിനോട് പറഞ്ഞത്. ആദ്യമായാണ് മകന്‍ വാഹനമോടിക്കുന്നതെന്നും പിതാവ് പോലീസിനോട് പറഞ്ഞിരുന്നു.ഞായറാഴ്ച ചേരാനല്ലൂരില്‍ പുലര്‍ച്ചെ മൂന്നുമണിയോടെയായിരുന്നു അപകടം. തട്ടുകടയിലെ ജോലി കഴിഞ്ഞ് പുലര്‍ച്ചെ വീട്ടിലേക്ക് മടങ്ങുകയായിരുന്നു ജയപാലകൃഷ്ണന്‍. അമിതവേഗത്തിലെത്തിയ കാര്‍ ജയപാലകൃഷ്ണന്‍ ഓടിച്ച സ്‌കൂട്ടറിന് പിന്നില്‍ ഇടിക്കുകയായിരുന്നു. ഇടിയുടെ ആഘാതത്തില്‍ സ്‌കൂട്ടര്‍ പൂര്‍ണ്ണമായും തകരുകയും ജയപാലകൃഷ്ണന്‍ റോഡിലേക്ക് തെറിച്ചു വീഴുകയും ചെയ്തു. ജയപാലകൃഷ്ണന്റെ സ്‌കൂട്ടറിലുണ്ടായിരുന്ന അരി ഉള്‍പ്പെടെയുള്ള സാധനങ്ങള്‍ റോഡില്‍ മീറ്ററുകളോളം ദൂരത്തേക്ക് ചിതറിത്തെറിച്ചു.ബെന്‍സ് കാറാണ് പതിനേഴുകാരന്‍ ഓടിച്ചിരുന്നത്. അപകടസമയത്ത് പ്രദേശത്ത് ശക്തമായ മഴ പെയ്തിരുന്നതിനാല്‍ റോഡ് വ്യക്തമായി കാണാന്‍ സാധിച്ചിരുന്നില്ലെന്നാണ് പതിനേഴുകാരന്‍ പോലീസിന് മൊഴി നല്‍കിയിട്ടുള്ളതെന്നാണ് വിവരം.
SUMMARY: Cheranalloor road accident; culpable homicide charge against judge’s son
