ശ്രീനഗര്‍: ജമ്മു കശ്മീര്‍ മുഖ്യമന്ത്രി ഒമര്‍ അബ്ദുള്ള വിവാഹിതനായി. മാധ്യമപ്രവര്‍ത്തകയായ നിധി റാസ്ദാനാണ് വധു. ഇന്നലെ ഇരുവരും ഒന്നിച്ചുള്ള ചിത്രം സമൂഹമാധ്യമങ്ങളിലൂടെ പങ്കുവെച്ച ഒമര്‍ അബുദുള്ള തന്നെയാണ് വിവാഹ വാർത്ത പുറത്തുവിട്ടത്.’ ഒരു പുതിയ യാത്ര ആരംഭിച്ചു’– എക്സിൽ മുഖ്യമന്ത്രി ഒമർ അബ്ദുല്ല കുറിച്ചു. സ്‌പെഷൽ മാര്യേജ് ആക്ട് പ്രകാരമാണ് വിവാഹം റജിസ്റ്റർ ചെയ്തതെന്ന് കുടുംബത്തോട് അടുപ്പമുള്ളവർ വാർത്താ ഏജൻസിയായ പിടിഐയോട് പറഞ്ഞു. ഒമർ അബ്ദുല്ലയുടെ രണ്ടാം വിവാഹമാണിത്.
A new journey began yesterday 💍@Nidhi https://t.co/BXbdLq2d1H
— Omar Abdullah (@OmarAbdullah) October 31, 2026
ഒമർ അബ്ദുല്ലയും ആദ്യ ഭാര്യ പായൽ അബ്ദുല്ലയും തമ്മിലുള്ള വിവാഹമോചനം അനുവദിച്ച് സുപ്രീം കോടതി ഉത്തരവിട്ട് മൂന്ന് മാസങ്ങൾക്ക് ശേഷമാണ് പുതിയ വിവാഹം. പരസ്പര സമ്മതത്തോടെ ബന്ധം അവസാനിപ്പിക്കുകയാണെന്നും പരസ്പരം ഫയൽ ചെയ്ത കേസുകൾ പിൻവലിക്കുകയാണെന്നും അറിയിച്ചതിനെ തുടർന്ന് കഴിഞ്ഞ ജൂലൈ 31 നാണ് സുപ്രീം കോടതി ഒമർ അബ്ദുല്ല – പായൽ അബ്ദുല്ല ദമ്പതികൾക്ക് വിവാഹമോചനം അനുവദിച്ചത്.
കശ്മീരിലെ പ്രമുഖ രാഷ്ട്രീയ കുടുംബത്തിലെ അംഗമാണ് ഒമര്‍ അബദുള്ള. ജമ്മു കശ്മീരിന്റെ മുന്‍ മുഖ്യമന്ത്രിയായിരുന്ന ഫാറൂഖ് അബ്ദുള്ളയുടെ മകനും, നാഷണല്‍ കോണ്‍ഫറന്‍സ് സ്ഥാപകനായ ഷെയ്ഖ് മുഹമ്മദ് അബ്ദുള്ളയുടെ പേരമകനുമാണ് ഇദ്ദേഹം. 1998, 1999, 2004 വര്‍ഷങ്ങളില്‍ ശ്രീനഗര്‍ മണ്ഡലത്തില്‍ നിന്നും ലോക്‌സഭയിലേക്ക് തിരഞ്ഞെടുക്കപ്പെട്ടിട്ടുണ്ട്. വാജ്പേയി സര്‍ക്കാരിന്റെ കാലത്ത് ഏറ്റവും പ്രായം കുറഞ്ഞ കേന്ദ്ര വിദേശകാര്യ സഹമന്ത്രിയായി അദ്ദേഹം ചുമതല വഹിച്ചു.
1994ലായിരുന്നു ഒമർ അബ്ദുല്ലയുടെ ആദ്യ വിവാഹം. ഡൽഹിയിലെ ഒബ്റോയ് ഹോട്ടലിൽ ജോലി ചെയ്യുന്നതിനിടെയാണ് ഒമർ അബ്ദുല്ലയും പായലും പരിചയപ്പെട്ടത്. ഇരുവർക്കും സഹീർ, സമീർ എന്നിങ്ങനെ രണ്ട് ആൺമക്കളുണ്ട്. 2009 മുതൽ ഇരുവരും വേർപിരിഞ്ഞാണ് താമസിച്ചിരുന്നത്. രാജ്യത്തെ പ്രമുഖ ഇംഗ്ലീഷ് മാധ്യമപ്രവർത്തകയും ടെലിവിഷൻ വാർത്താ അവതാരകയുമാണ് നിധി റസ്ദാൻ. എൻ.ഡി.ടി.വിയിലൂടെയാണ് ദേശീയ ശ്രദ്ധ നേടുന്നത്. സ്പെഷ്യൽ മാരേജ് ആക്ട് പ്രകാരം വെള്ളിയാഴ്ചയാണ് വിവാഹം നടന്നത്. ഇരുവരുടെയും കുടുംബാംഗങ്ങളും അടുത്ത സുഹൃത്തുക്കളും മാത്രമാണ് പങ്കെടുത്തത്. 49കാരിയായ നിധി റസ്ദാന്റെ രണ്ടാം വിവാഹമാണിത്.
SUMMARY: Jammu and Kashmir Chief Minister Omar Abdullah gets married; The bride is journalist Nidhi Razdan
