ജറുസലം: ഇസ്രയേലിൽ യാഷർ പാർട്ടി ചെയർമാൻ ഗാദി ഐസൻകോട്ടിനു പിന്തുണ പ്രഖ്യാപിച്ച് അറബ് പാർട്ടി സഖ്യം. ഐസൻകോട്ടിനെ പ്രധാനമന്ത്രി സ്ഥാനത്തേക്കു പിന്തുണയ്ക്കുമെന്നും അറബ് പാർട്ടികൾ വ്യാഴാഴ്ച അറിയിച്ചു. സർക്കാർ രൂപീകരിക്കുന്നതുമായി ബന്ധപ്പെട്ട് ഇസ്രയേൽ പ്രസിഡന്റ് ഐസക് ഹെർസോഗുമായുള്ള ചർച്ചയ്ക്കിടെ ഐസൻകോട്ടിന്റെ പേര് പ്രധാനമന്ത്രി സ്ഥാനത്തേക്കു നിർദേശിക്കുമെന്നും അറബ് പാർട്ടികൾ പറഞ്ഞു.
ലിക്കുഡ് പാർട്ടി നേതാവും നിലവിലെ കാവൽ പ്രധാനമന്ത്രിയുമായ ബെന്യാമിൻ നെതന്യാഹുവിനു കടുത്ത ഭീഷണിയുയർത്തുന്ന തീരുമാനമാണിത്. ഇതിന് പുറമെ ലിക്വഡ് പാർട്ടിയുടെ സഖ്യകക്ഷിയായ യുണൈറ്റഡ് തോറ ജൂഡായിസം പാർട്ടിയും പ്രധാനമന്ത്രി പദത്തിലേക്ക് നെതന്യാഹുവിന്റെ പേര് നിർദ്ദേശിച്ചില്ല. പാർട്ടി പ്രതിനിധികളുമായുള്ള പ്രസിഡന്റ് ഐസക് ഹെർസോഗിന്റെ കൂടിക്കാഴ്ചയിൽ പ്രധാനമന്ത്രി പദത്തിലേക്ക് അവർ ആരെയും പിന്തുണച്ചില്ല. ഇവർക്ക് ഏഴു സീറ്റുകളാണുള്ളത്. എന്നാൽ അറബ് പാർട്ടികളുമായി സർക്കാരുണ്ടാക്കാൻ ശ്രമിക്കില്ലെന്ന് വ്യക്തമാക്കിയ ഐസൻകോട്ടിനെ രണ്ട് അറബ് പാർട്ടികൾ പ്രധാനമന്ത്രി പദത്തിലേക്ക് നിർദേശിക്കുകയും ചെയ്തു. ഇതോടെ നെതന്യാഹുവിനേക്കാൾ മേൽക്കൈ ഐസൻകോട്ടിന് ലഭിച്ചു.
ഐസക് ഹെർസോഗ് ഉടൻ തന്നെ ഐസൻകോട്ടുമായും നെതന്യാഹുവുമായും പ്രത്യേകം ചർച്ചകൾ നടത്തും. മറ്റൊരു പൊതുതിരഞ്ഞെടുപ്പ് ഒഴിവാക്കാൻ പാർട്ടികൾ പരമാവധി വിട്ടുവീഴ്ച ചെയ്യണമെന്ന് ഹെർസോഗ് കക്ഷി നേതാക്കളോട് ആവശ്യപ്പെട്ടു. രാജ്യം നേരിടുന്ന സുരക്ഷാ വെല്ലുവിളികളും നയതന്ത്ര പ്രതിസന്ധികളും കണക്കിലെടുത്ത് വലിയ ഉത്തരവാദിത്തമാണ് മുന്നിലുള്ളതെന്ന് ഓരോരുത്തരും തിരിച്ചറിയണമെന്ന് അദ്ദേഹം ആവശ്യപ്പെട്ടു.
പ്രധാനമന്ത്രി സ്ഥാനാർത്ഥികളെ കണ്ട ശേഷം വിവിധ രാഷ്ട്രീയ കക്ഷികളുമായും ഹെർസോഗ് കൂടിക്കാഴ്ച നടത്തും. തിരഞ്ഞെടുപ്പിൽ നെതന്യാഹു സഖ്യത്തിന് 53 സീറ്റും പ്രതിപക്ഷത്തെ ഐസൻകോട്ടിൻ്റെ നേതൃത്വത്തിലുള്ള മധ്യ-ഇടത് യാഷർ സഖ്യത്തിന് 48 സീറ്റും ലഭിച്ചു. അറബ് ജനതയെ പ്രതിനിധീകരിക്കുന്ന രണ്ട് പാർട്ടികൾ 19 സീറ്റുകൾ നേടിയിരുന്നു.
നിലവിൽ പാർട്ടികൾ നിർദേശിച്ച പേരുകൾ പ്രകാരം ഐസൻകോട്ടിനാണ് സർക്കാർ രൂപീകരിക്കുന്നതിൽ മുൻതൂക്കം. പ്രധാനമന്ത്രിയെ തിരഞ്ഞെടുക്കുന്നതിന് ഇന്നലെയും ഇന്നുമായി വിവിധ പാർട്ടി നേതാക്കളുമായി പ്രസിഡന്റ് ഹെർസോഗ് കൂടിക്കാഴ്ച നടത്തിവരികയാണ്. പാർട്ടികളുമായുള്ള ചർച്ചയ്ക്ക് ശേഷം പുതിയ സർക്കാർ രൂപീകരിക്കാൻ ആരെയാണ് ക്ഷണിക്കേണ്ടതെന്ന് ഹെർസോഗ് തീരുമാനിക്കും.
SUMMARY: Arab parties join forces against Netanyahu; is Eisenkot in the running for Prime Minister?
