ന്യൂഡൽഹി: ദീപാവലി ആഘോഷങ്ങൾക്ക് പിന്നാലെ അതിതീവ്രമായ വായുമലിനീകരണത്തിലും വിഷപ്പുകയിലും മുങ്ങി രാജ്യതലസ്ഥാനം. ഡൽഹിയുടെ പല ഭാഗങ്ങളിലും വായു ഗുണനിലവാര സൂചിക (AQI) 500 കടന്ന് അതിഗുരുതരാവസ്ഥയിലേക്ക് എത്തിയിരിക്കുന്നു. സുപ്രീം കോടതിയുടെയും സർക്കാരിന്റെയും കർശന നിർദ്ദേശങ്ങൾ ലംഘിച്ച് ഹരിത പടക്കങ്ങൾക്ക് പുറമെ സാധാരണ പടക്കങ്ങളും വ്യാപകമായി പൊട്ടിച്ചതാണ് മലിനീകരണം ഇത്രയധികം വർദ്ധിക്കാൻ പ്രധാന കാരണം. കനത്ത പുകമൂലം ദൃശ്യപരിധി വളരെധികം കുറഞ്ഞത് റോഡ്, റെയിൽ, ഗതാഗതങ്ങളെ സാരമായി ബാധിച്ചിട്ടുണ്ട്. സ്ഥിതിഗതികൾ ഗുരുതരമായതോടെ വരും മണിക്കൂറുകളിൽ ഡൽഹി സർക്കാർ കൂടുതൽ കർശന നിയന്ത്രണങ്ങൾ ഏർപ്പെടുത്താൻ ആലോചിക്കുന്നുണ്ട്.
മറ്റ് പ്രധാന നഗരങ്ങളിലും ദീപാവലി ആഘോഷങ്ങൾ ദുരന്തങ്ങളിലാണ് കലാശിച്ചത്. മുംബൈയുടെ വിവിധ ഭാഗങ്ങളിൽ ദീപാവലി രാത്രിയിൽ വ്യാപകമായി തീപിടിത്തങ്ങൾ റിപ്പോർട്ട് ചെയ്യപ്പെട്ടു. ഡോംഗ്രിയിലുണ്ടായ വൻ തീപിടിത്തത്തിൽ നിരവധി കടകളും കുടിലുകളുമാണ് പൂർണ്ണമായി കത്തിനശിച്ചത്. കൂടാതെ വിരാർ, താനെ എന്നിവിടങ്ങളിലെ റസിഡൻഷ്യൽ കെട്ടിടങ്ങളിലും, നവി മുംബൈയിലെ തുർബെയിലുള്ള ഒരു ഷോപ്പിംഗ് സെന്ററിലെ സോഫ നിർമ്മാണ യൂണിറ്റിൽ പടക്കം വീണും വലിയ തീപിടിത്തങ്ങളുണ്ടായി. താനെയിൽ തീപിടിത്തമുണ്ടായ റസിഡൻഷ്യൽ കെട്ടിടം മഹാരാഷ്ട്ര ഉപമുഖ്യമന്ത്രി ഏകനാഥ് ഷിൻഡെ നേരിട്ടെത്തി സന്ദർശിക്കുകയും സ്ഥിതിഗതികൾ വിലയിരുത്തുകയും ചെയ്തു.
ഇതിനുപുറമെ, വിവിധ സംസ്ഥാനങ്ങളിൽ പടക്കം പൊട്ടിച്ചതുമൂലമുണ്ടായ അപകടങ്ങളിൽ നിരവധി പേർക്കാണ് പരിക്കേറ്റത്. തമിഴ്നാട്ടിൽ പടക്കം പൊട്ടിക്കുന്നതിനിടയിലുണ്ടായ അപകടത്തിൽ ഒരു കുട്ടി മരണപ്പെടുകയും, പരിക്കേറ്റ നിരവധി പേരെ ആശുപത്രികളിൽ പ്രവേശിപ്പിച്ച് ചികിത്സ നൽകിവരികയും ചെയ്യുന്നുണ്ട്. ആഘോഷങ്ങളുടെ ആവേശത്തിനിടയിൽ സുരക്ഷാ മാനദണ്ഡങ്ങൾ പാലിക്കാത്തതും നിയമങ്ങൾ ലംഘിക്കപ്പെട്ടതുമാണ് രാജ്യത്തുടനീളം ഇത്രയധികം ദുരന്തങ്ങൾക്കും മലിനീകരണ വർദ്ധനവിനും കാരണമായത്.
SUMMARY: Delhi engulfed in toxic fumes after Diwali; Air quality index crossed 500
