ടെൽ അവീവ്: ഇസ്രയേലിൽ പുതിയ സഖ്യസർക്കാർ രൂപീകരിക്കാൻ നിലവിലെ പ്രധാനമന്ത്രി ബെഞ്ചമിൻ നെതന്യാഹുവിനെയും തന്റെ ഭരണസഖ്യത്തിൽ ഉൾപ്പെടുത്താൻ തയ്യാറാണെന്ന് പ്രതിപക്ഷ നേതാവ് ഗാദി ഐസൻകോട്ട്. സർക്കാർ രൂപീകരിക്കാൻ അറബ് പാർട്ടികളുടെ പിന്തുണ പൂർണമായി ഒഴിവാക്കുന്നതിന്‍റെ ഭാഗമായാണ് ഈ നിർണായക നീക്കം. ജറുസലേമിലെ പ്രസിഡന്റിന്റെ വസതിയിൽ നടന്ന ചടങ്ങിൽ സംസാരിക്കവെ നെതന്യാഹുവിന്റെ സഖ്യകക്ഷിയും തീവ്രവലതുപക്ഷ ധനകാര്യ മന്ത്രിയുമായ ബെസലേൽ സ്മോട്രിച്ചിനെയും ഒപ്പം കൂട്ടാൻ തയ്യാറാണെന്ന് ഗാദി ഐസൻകോട്ട് വ്യക്തമാക്കി.
“ഐക്യത്തിനുള്ള സമയമാണിതെന്ന് ലികുഡ് പാർട്ടിയുടെയും റിലീജിയസ് സയണിസ്റ്റ് പാർട്ടിയുടെയും അംഗങ്ങൾ യഥാർത്ഥത്തിൽ വിശ്വസിക്കുന്നുണ്ടെങ്കിൽ, എന്‍റെ നേതൃത്വത്തിലുള്ള സർക്കാരിനെയും ഞാൻ മുന്നോട്ടുവെച്ച തത്വങ്ങളെയും പിന്തുണയ്ക്കാതിരിക്കാൻ അവർക്കാവില്ല,” എന്ന് ഐസൻകോട്ട് വ്യക്തമാക്കി.
ഇസ്രയേലിൽ ഒക്ടോബർ 27-ന് നടന്ന പൊതുതിരഞ്ഞെടുപ്പിൽ ആർക്കും വ്യക്തമായ ഭൂരിപക്ഷം ലഭിക്കാത്തതിനെത്തുടർന്ന്, പുതിയ സർക്കാർ രൂപീകരിക്കാനുള്ള ഔദ്യോഗിക ചുമതല പ്രതിപക്ഷ സഖ്യത്തിന്റെ നേതാവായ ഗാദി ഐസൻകോട്ടിന് (Gadi Eisenkot) പ്രസിഡന്റ് ഇസഹാക്ക് ഹെർസോഗ് കൈമാറിയിരിന്നു. അടുത്ത 28 ദിവസത്തിനുള്ളിൽ ഭൂരിപക്ഷം തെളിയിക്കാൻ സാധിച്ചാൽ മാത്രമേ ഐസൻകോട്ടിന് ഇസ്രയേലിന്റെ പ്രധാനമന്ത്രിയാകാൻ കഴിയൂ. 28 ദിവസത്തിനുള്ളിൽ അതിന് സാധിച്ചില്ലെങ്കിൽ ആവശ്യമെങ്കിൽ ഇസ്രയേൽ പ്രസിഡന്റിന് അടുത്ത ആളെ ക്ഷണിക്കുന്നതിന് മുമ്പായി 14 ദിവസംകൂടി കാലാവധി നീട്ടിനൽകാം. ഇതിലും പരാജയപ്പെട്ടാൽ നെതന്യാഹുവിന്റെ ഊഴമായിരിക്കും. ഇത്തവണ പരമാവധി 28 ദിവസത്തെ സമയപരിധിയായിരിക്കും അനുവദിക്കുക.
സർക്കാർ രൂപീകരണത്തിന് അറബ് പാർട്ടികളുടെ പിന്തുണ ലഭ്യമാണെങ്കിലും, അവരെ സഖ്യത്തിൽ നേരിട്ട് ഉൾപ്പെടുത്തുന്നതിൽ ഐസൻകോട്ടിന്റെ മുന്നണിയിലെ പല ജൂത പാർട്ടികൾക്കും വിയോജിപ്പുണ്ട്. ഇത് ഒഴിവാക്കാനാണ് നെതന്യാഹുവിന്റെ ലിക്വിഡ് പാർട്ടിയെയും സഖ്യകക്ഷിയായ റിലീജിയസ് സയണിസ്റ്റ് പാർട്ടിയെയും ഐസൻകോട്ട് ക്ഷണിച്ചത്. രാജ്യം നേരിടുന്ന അടിയന്തിര സാഹചര്യം കണക്കിലെടുത്ത് ഐക്യ സർക്കാരിന് തയ്യാറാണെന്ന് നെതന്യാഹുവിന്റെ സഖ്യം വ്യക്തമാക്കുന്നുണ്ടെങ്കിൽ, തന്റെ നേതൃത്വത്തിലുള്ള സർക്കാരിനെ പിന്തുണയ്ക്കാൻ അവർക്ക് മടിയുണ്ടാകേണ്ടതില്ലെന്നാണ് ഐസൻകോട്ട് ഞായറാഴ്ച അറിയിച്ചത്. അതായത്, നെതന്യാഹുവിന്റെ പാർട്ടിയെ സഖ്യത്തിൽ ഉൾപ്പെടുത്താമെങ്കിലും ഭരണം തന്റെ നേതൃത്വത്തിലായിരിക്കുമെന്ന നിലപാടിലാണ് ഐസൻകോട്ട്.
നെതന്യാഹുവിന്റെ കടുംപിടുത്തങ്ങൾ കാരണം രാജ്യം വലിയ രീതിയിലുള്ള നയതന്ത്ര-സാമ്പത്തിക പ്രതിസന്ധിയും രാജ്യാന്തര ഒറ്റപ്പെടലും നേരിടുകയാണെന്നും, ഇതിൽ നിന്ന് ഇസ്രയേലിനെ രക്ഷിക്കാൻ മുൻവിധികൾ മാറ്റിവെച്ചുള്ള രാഷ്ട്രീയ നീക്കങ്ങൾ ആവശ്യമാണെന്നും മുൻ സൈനിക മേധാവി കൂടിയായ ഐസൻകോട്ട് വ്യക്തമാക്കിയിട്ടുണ്ട്. നെതന്യാഹു ഈ ക്ഷണം സ്വീകരിക്കുമോ അതോ പ്രതിപക്ഷ നീക്കങ്ങളെ പ്രതിരോധിക്കാൻ മറ്റ് വഴികൾ നോക്കുമോ എന്നാണ് ഇപ്പോൾ ഇസ്രയേൽ രാഷ്ട്രീയം ഉറ്റുനോക്കുന്നത്.
SUMMARY: Israel’s new government moves to demonetize: Gadi Eisenkot says he is ready to accept Netanyahu’s support
