കണ്ണൂർ: കണ്ണൂർ ജില്ലാ പഞ്ചായത്ത് മുൻ അധ്യക്ഷ പി പി ദിവ്യക്കെതിരായ അന്വേഷണത്തിന്റെ ഭാഗമായി കാർട്ടണ്‍ അലയൻസ് ഇന്ത്യയുടെ ഓഫീസില്‍ പരിശോധന നടത്തി വിജിലൻസ്. പ്രധാന ഉദ്യോഗസ്ഥർ സ്ഥലത്തില്ലാതിരുന്നതിനാല്‍ രേഖകള്‍ കസ്റ്റഡിയിലെടുക്കാൻ അന്വേഷണസംഘത്തിന് കഴിഞ്ഞില്ല. കമ്പനിയുടെ ഡയറക്ടർമാരുടെ മൊഴി രേഖപ്പെടുത്താനും വിജിലൻസ് തീരുമാനിച്ചിട്ടുണ്ട്.
നേരത്തെ കണ്ണൂർ ജില്ലാ പഞ്ചായത്ത് ഓഫീസിലും സില്‍ക്കിലും വിജിലൻസ് പരിശോധന നടത്തി രേഖകള്‍ പിടിച്ചെടുത്തിരുന്നു. ഇതിന്റെ തുടർച്ചയായാണ് കാർട്ടണ്‍ അലയൻസ് ഇന്ത്യയുടെ ഓഫീസിലും പരിശോധന നടത്തിയത്. അന്വേഷണം വേഗത്തില്‍ പൂർത്തിയാക്കി റിപ്പോർട്ട് സമർപ്പിക്കാനാണ് വിജിലൻസിന്റെ നീക്കം. ഇതിന് ശേഷമായിരിക്കും എഫ്‌ഐആർ രജിസ്റ്റർ ചെയ്യുന്നതുള്‍പ്പെടെയുള്ള തുടർനടപടികള്‍ സ്വീകരിക്കുക.
വരും ദിവസങ്ങളില്‍ പി പി ദിവ്യയുടെയും പരാതിക്കാരുടെയും മൊഴി രേഖപ്പെടുത്തുമെന്നും വിജിലൻസ് അറിയിച്ചു. കണ്ണൂർ ജില്ലാ പഞ്ചായത്ത് പ്രസിഡന്റായിരിക്കെ ടെൻഡർ നടപടികള്‍ ഒഴിവാക്കി കാർട്ടണ്‍ അലയൻസ് ഇന്ത്യ എന്ന സ്വകാര്യ കമ്പനിക്ക് നിർമാണ കരാർ നല്‍കിയെന്നാണ് പി പി ദിവ്യക്കെതിരായ പ്രധാന ആരോപണം. കമ്പനി ദിവ്യയുടെ ബിനാമിയാണെന്നും പരാതിയുണ്ട്. ഈ ആരോപണങ്ങളിലാണ് വിജിലൻസ് അന്വേഷണം നടത്തുന്നത്.
SUMMARY: Investigation against PP Divya: Vigilance conducts inspection at the office of Carlton Alliance India
