ബെംഗളൂരു: മൈസൂരുവിലെ പെട്രോൾ പമ്പിൽ വിതരണം ചെയ്യുന്ന ഇ-20 (E20) പെട്രോളിൽ എഥനോളിന്റെ അളവ് അനുവദനീയമായ പരിധിയിലും കൂടുതലാണെന്ന തരത്തിലുള്ള പ്രചാരണങ്ങൾ അടിസ്ഥാനരഹിതമെന്ന് ബിപിസിഎൽ. ഭാരത് പെട്രോളിയം കോർപ്പറേഷൻ ലിമിറ്റഡ് (BPCL).
പരിശോധനാ പ്രക്രിയ പൂർത്തിയാകുന്നതിന് മുൻപുള്ള ഒരു ചിത്രം തെറ്റായി വ്യാഖ്യാനിക്കപ്പെട്ടതാണ് വിവാദത്തിന് കാരണമായതെന്ന് കമ്പനി വ്യക്തമാക്കി കർണാടക സർക്കാരിന്റെ ആരോപണങ്ങളെ പ്രതിരോധിക്കുന്നതിന്റെ ഭാഗമായി, മൈസൂരുവിലെ പമ്പിൽ നടത്തിയ ഇന്ധന പരിശോധനയുടെ ചിത്രം ബിപിസിഎൽ എക്സിൽ പങ്കുവെച്ചിരുന്നു. ഈ ചിത്രത്തിൽ എഥനോളിന്റെ അളവ് നിശ്ചിത പരിധിയായ 20 ശതമാനത്തിന് പകരം 33 ശതമാനത്തോളം കാണിക്കുന്നുണ്ടെന്ന് ചൂണ്ടിക്കാട്ടി നിരവധി പേർ രംഗത്തെത്തി. ഇതോടെ ബിപിസിഎൽ പോസ്റ്റ് പിൻവലിച്ചെങ്കിലും സ്ക്രീൻഷോട്ടുകൾ വ്യാപകമായി പ്രചരിക്കുകയായിരുന്നു. 100 മില്ലിലിറ്റർ പെട്രോളും 30 മില്ലിലിറ്റർ വെള്ളവും ചേർത്താണ് എഥനോളിന്റെ അളവ് വേർതിരിച്ച് പരിശോധിക്കുന്നത്. തുടക്കത്തിൽ ഈ മിശ്രിതം പാൽ പോലെ കലങ്ങിയ നിലയിലായിരിക്കും കാണപ്പെടുക. എഥനോൾ-വെള്ളം, പെട്രോൾ എന്നീ പാളികൾ പൂർണ്ണമായി വേർതിരിയുന്നതിന് മുൻപുള്ള ചിത്രമാണ് അബദ്ധത്തിൽ പോസ്റ്റ് ചെയ്യപ്പെട്ടതെന്നും തെറ്റിദ്ധാരണ ഒഴിവാക്കാനാണ് ഉദ്യോഗസ്ഥൻ പോസ്റ്റ് ഉടൻ നീക്കം ചെയ്തതെന്നും കമ്പനി അറിയിച്ചു
രാജ്യത്തുടനീളം തങ്ങളുടെ റീട്ടെയിൽ ഔട്ട്‌ലറ്റുകൾ വഴി വിതരണം ചെയ്യുന്ന ഇ20 പെട്രോളിന് ബ്യൂറോ ഓഫ് ഇന്ത്യൻ സ്റ്റാൻഡേർഡ്‌സിന്‍റെ ഐഎസ് 17021 മാനദണ്ഡങ്ങൾ അനുസരിച്ചുള്ള ഗുണനിലവാരം ഉറപ്പാക്കുന്നുണ്ടെന്നും കമ്പനി വ്യക്തമാക്കി.
SUMMARY: Claims of excessive ethanol content at a pump in Mysuru are incorrect; BPCL
