ബെംഗളൂരു: നമ്മ മെട്രോയുടെ പിങ്ക് ലൈനിലെ പുതിയ എലിവേറ്റഡ് പാതയിൽ ആദ്യദിനം 33,000-ത്തിലേറെ പേർ യാത്ര ചെയ്തു.നവംബർ 14 ശനിയാഴ്ച പൊതുജനങ്ങൾക്കായി തുറന്ന കലേന അഗ്രഹാര–എസ്.ജി. പാള്യ പാതയിലാണ് യാത്രക്കാരുടെ മികച്ച പങ്കാളിത്തം രേഖപ്പെടുത്തിയത്.
ഏകദേശം 7.5 കിലോമീറ്റർ ദൈർഘ്യമുള്ള പുതിയ പാതയിൽ ഏഴ് സ്റ്റേഷനുകളാണുള്ളത്. കലേന അഗ്രഹാര, ഹുലിമാവ്, ഐ.ഐ.എം.ബി., ജെ.പി. നഗർ നാലാം ഘട്ടം, ജയദേവ ആശുപത്രി, ബി.ടി.എം., എസ്.ജി. പാള്യ എന്നിവയാണ് സ്റ്റേഷനുകൾ. പാത തുറന്നതോടെ തെക്കൻ ബെംഗളൂരുവിലെ നിരവധി പ്രദേശങ്ങളിലേക്കുള്ള മെട്രോ യാത്ര കൂടുതൽ എളുപ്പമായി.
പ്രധാനമന്ത്രി നരേന്ദ്ര മോദിയാണ് നവംബർ 13-ന് പാത ഉദ്ഘാടനം ചെയ്തത്. തുടർന്ന് നടത്തിയ മെട്രോ യാത്രയ്ക്കുശേഷം നവംബർ 14 മുതലാണ് പൊതുജനങ്ങൾക്കായി വാണിജ്യ സർവീസ് ആരംഭിച്ചത്. പാതയുടെ ഉദ്ഘാടനത്തോടെ ബെംഗളൂരുവിലെ പ്രവർത്തനക്ഷമമായ മെട്രോ ശൃംഖലയുടെ ആകെ ദൈർഘ്യം 103 കിലോമീറ്ററായി.
പുതിയ പാതയിലൂടെ യാത്രക്കാരുടെ എണ്ണം ഇനിയും വർധിക്കുമെന്നാണ് ബെംഗളൂരു മെട്രോ റെയിൽ കോർപ്പറേഷന്റെ പ്രതീക്ഷ. തെക്കൻ ബെംഗളൂരുവിലെ ഗതാഗതക്കുരുക്ക് കുറയ്ക്കുന്നതിനും നഗരത്തിലെ വിവിധ മേഖലകളെ മെട്രോ ശൃംഖലയുമായി ബന്ധിപ്പിക്കുന്നതിനും പുതിയ പാത സഹായിക്കുമെന്നാണ് വിലയിരുത്തൽ.
SUMMARY: Over 33,000 people traveled on the Pink Line on its first day.
