കോഴിക്കോട്: ഡിവൈഎഫ്ഐ പ്രവർത്തകനായ തൂണേരി സ്വദേശി ഷിബിൻ വധക്കേസിലെ പ്രതികള്ക്കായി ലുക്ക് ഔട്ട് നോട്ടീസ് പുറത്തിറക്കി. മുസ്ലിംലീഗ് പ്രവർത്തകരായ ഏഴ് പ്രതികള്ക്ക് വേണ്ടിയാണ് ലുക്ക് ഔട്ട് നോട്ടീസ് പുറത്തിറക്കിയിരിക്കുന്നത്. ആറു പേർ വിദേശത്തും ഒരാള് ചെന്നൈയിലുമാണെന്നാണ് വിവരം.
ഷിബിൻ വധക്കേസില് വിചാരണ കോടതി വെറുതെ വിട്ട പ്രതികള് കുറ്റക്കാരാണെന്ന് ഹൈക്കോടതി കണ്ടെത്തിയിരുന്നു. ഈ മാസം 15ന് മുമ്പ് അറസ്റ്റ് ചെയ്തു വിചാരണ കോടതിയില് ഹാജരാക്കാൻ ഹൈക്കോടതി നിർദേശം നല്കിയിരുന്നു. ഇതിന്റെ അടിസ്ഥാനത്തിലാണ് പ്രതികള്ക്കായി നാദാപുരം പോലീസ് ലുക്ക് ഔട്ട് നോട്ടീസ് പുറപ്പെടുവിച്ചത്.
2015 ജനുവരി 22നായിരുന്നു ഡിവൈഎഫ്ഐ പ്രവർത്തകനായ ഷിബിൻ കൊല്ലപ്പെട്ടത്. ഷിബിനെ രാഷ്ട്രീയ വിരോധത്തിന്റെ പേരില് മുസ്ലിം ലീഗ് പ്രവർത്തകർ സംഘം ചേർന്ന് ആക്രമിച്ച് കൊലപ്പെടുത്തിയെന്നാണ് കേസ്. ഒന്ന് മുതല് പതിനൊന്ന് വരെയുള്ള പ്രതികള് കൊലപാതക സംഘത്തിലുള്ളവരും പന്ത്രണ്ട് മുതല് പതിനേഴ് വരെയുള്ള പ്രതികള് കൊലയാളികളെ രക്ഷപ്പെടാനും ഒളിവില് കഴിയാനും സഹായിച്ചവരാണ്.
കേസില് 66 സാക്ഷിമൊഴികളും 151 രേഖകളും 55 തൊണ്ടി മുതലുകളുമാണ് പോലീസ് സമർപ്പിച്ചത്. 2016 മെയില് കേസിലെ പ്രതികളെ എരഞ്ഞിപ്പാലം അഡീഷണല് സെഷൻസ് കോടതി കുറ്റക്കാരല്ലെന്ന് കണ്ടെത്തി വെറുതെവിട്ടു.
TAGS : SHIBIN MURDER CASE | ACCUSED | LOOK OUT NOTICE
SUMMARY : Shibin murder case; A look-out notice has been issued for the accused
