മലപ്പുറം: നിലമ്പൂർ-അകമ്പാടത്ത് സ്വകാര്യ ആശുപത്രിയിലെ ശുചിമുറിയില് നവജാത ശിശുവിനെ ബക്കറ്റില് ഉപേക്ഷിച്ച നിലയില് കണ്ടെത്തി. ബക്കറ്റിനുള്ളില് കണ്ടെത്തിയ കുഞ്ഞ് മരിച്ച നിലയിലായിരുന്നുവെന്ന് പോലീസ് അറിയിച്ചു. സംഭവവുമായി ബന്ധപ്പെട്ട് ചാലിയാർ സ്വദേശിനിയായ യുവതിയെ കേന്ദ്രീകരിച്ച് അന്വേഷണം പുരോഗമിക്കുകയാണ്.
വയറുവേദനയെ തുടർന്ന് കഴിഞ്ഞ രാത്രി 12 മണിയോടെയാണ് യുവതി ആശുപത്രിയിലെത്തിയത്. ആശുപത്രിയില് ഗൈനക്കോളജിസ്റ്റിന്റെ സേവനം ലഭ്യമല്ലാത്തതിനാല് കൂടുതല് ചികിത്സയ്ക്കായി മറ്റൊരു ആശുപത്രിയിലേക്ക് റഫർ ചെയ്യാനുള്ള നടപടികള് സ്വീകരിച്ചിരുന്നു. ഇതിനിടെയാണ് ആശുപത്രിയിലെ ശുചിമുറിയില് യുവതി പ്രസവിച്ചതെന്നാണ് പ്രാഥമിക വിവരം.
തുടർന്ന് നവജാത ശിശുവിനെ ബക്കറ്റില് ഉപേക്ഷിച്ച ശേഷം ആശുപത്രി വിട്ടതായും പോലീസ് സംശയിക്കുന്നു. രാവിലെ ശുചിമുറി വൃത്തിയാക്കാനെത്തിയ ജീവനക്കാരാണ് ബക്കറ്റിനുള്ളില് കുഞ്ഞിനെ കണ്ടെത്തിയത്. വിവരം ലഭിച്ചതിനെ തുടർന്ന് നിലമ്പൂർ പോലീസ് ആശുപത്രിയിലെത്തി പരിശോധന ആരംഭിച്ചു. സംഭവത്തിന്റെ സാഹചര്യങ്ങളും മരണകാരണവും ഉള്പ്പെടെ വിശദമായ അന്വേഷണം നടക്കുകയാണ്.
SUMMARY: Newborn baby found abandoned in the restroom of a private hospital in Nilambur
