മലിനജലം കുടിച്ച് ഒരു മരണം

ബെംഗളൂരു: മൈസൂരുവിൽ മലിനജലം കുടിച്ച് ഒരു മരണം. ചാമുണ്ഡേശ്വരി നിയമസഭാ മണ്ഡലത്തിലെ സലുണ്ടി ഗ്രാമത്തിൽ കനകരാജ് (20) ആണ് മരിച്ചത്. ഗ്രാമത്തിലെ 20ഓളം പേർക്ക് വെള്ളം കുടിച്ച് ദേഹാസ്വാസ്ഥ്യം അനുഭവപ്പെട്ടു. ഇവരെ സമീപത്തെ ആശുപത്രിയിൽ പ്രവേശിപ്പിച്ചു.

തിങ്കളാഴ്ചയാണ് കനകരാജിനെ ഛർദ്ദി, വയറിളക്കം എന്നീ ലക്ഷണങ്ങളോടെ നഗരത്തിലെ സ്വകാര്യ ആശുപത്രിയിൽ പ്രവേശിപ്പിച്ചത്. സമാനമായ രോഗലക്ഷണങ്ങളുള്ള 20 പേരെ കൂടി ആശുപത്രിയിൽ പ്രവേശിപ്പിച്ചിട്ടുണ്ടെന്ന് മുഖ്യമന്ത്രി സിദ്ധരാമയ്യ പറഞ്ഞു. ജലമലിനീകരണത്തിൻ്റെ കാരണം കണ്ടെത്തി ഉചിതമായ നടപടി സ്വീകരിക്കാൻ ജില്ലാ ഉദ്യോഗസ്ഥർക്ക് നിർദേശം നൽകിയതായി മുഖ്യമന്ത്രി പറഞ്ഞു.