ബെംഗളൂരു: ഇലക്ട്രോണിക് സിറ്റിയിലേക്കുള്ള നമ്മ മെട്രോ ആർ.വി. റോഡ്-ബൊമ്മസന്ദ്ര 19.15 കിലോമീറ്റർ പാതയിൽ റെയിൽവേ സുരക്ഷാ കമ്മിഷണറുടെ പരിശോധന ആരംഭിച്ചു. മെട്രോ റെയിൽവേ സേഫ്റ്റി സൗത്തേൺ സർക്കിൾ കമ്മിഷണർ എ.എം. ചൗധരിയുടെ നേതൃത്വത്തിൽ നടക്കുന്ന പരിശോധന 25 വരെ തുടരും. ട്രെയിൻ, ട്രാക്ക്, സിഗ്നലിങ്, സ്റ്റേഷൻ എന്നിവയുടെ സുരക്ഷയാണ് പരിശോധിക്കുന്നത്.
25ന് ബയ്യപ്പനഹള്ളി ഡിപ്പോയിലെ ഓപ്പറേഷൻസ് കൺട്രോൾ സെന്ററിലും പരിശോധന നടക്കും. റെയിൽവേ അനുമതി ലഭിച്ചതിനു ശേഷമാണ് പാതയിൽ സർവീസ് ആരംഭിക്കാനാകുക. ഓഗസ്റ്റ് 15ന് പാതയിൽ സർവീസ് ആരംഭിക്കാനാണ് ഉദ്ദേശിക്കുന്നത്.
16 സ്റ്റേഷനുകളാണ് പാതയിലുള്ളത്. ആർവി റോഡ്, റാഗിഗുഡ്ഡ, ജയദേവ ഹോസ്പിറ്റൽ, ബിടിഎം ലേഔട്ട്, സെൻട്രൽ സിൽക്ക് ബോർഡ്, ബൊമ്മനഹള്ളി, ഹൊങ്ങസന്ദ്ര, കുട്ലു ഗേറ്റ്, സിങ്ങസന്ദ്ര, ഹൊസ റോഡ്, ബെരടന അഗ്രഹാര, ഇലക്ട്രോണിക് സിറ്റി, കോനപ്പന അഗ്രഹാര, ഹുസ്കൂർ റോഡ്, ഹെബ്ബഗോഡി, ബൊമ്മസന്ദ്ര എന്നിവയാണ് സ്റ്റേഷനുകൾ.
SUMMARY: Namma Metro’s Yellow Line safety inspection begins from today.
