ന്യൂഡൽഹി: വിമാനാപകടത്തില് മരിച്ച 166 പേരുടെ കുടുംബങ്ങള്ക്ക് എയർ ഇന്ത്യ ഇടക്കാല നഷ്ടപരിഹാരം നല്കി. യാത്രക്കാരായ 147 പേരുടെ കുടുംബത്തിനും യാത്രക്കാരല്ലാത്ത 19 പേരുടെ കുടുംബത്തിനുമാണ് 25 ലക്ഷം രൂപവീതം സഹായം നല്കിയത്. ഇത് കൂടാതെ 52 പേരുടെ രേഖകള് കൂടി കൈവശമുണ്ടെന്നും അവർക്കും ഉടൻ സഹായം വിതരണം ചെയ്യുമെന്നും എയർ ഇന്ത്യ അറിയിച്ചു.
അപകടത്തില് ജീവൻ നഷ്ടപ്പെട്ടവരുടെ സ്മരണാർത്ഥം ‘എഐ 171 മെമ്മോറിയല് ആൻഡ് വെല്ഫെയർ ട്രസ്റ്റ്’ എന്ന ചാരിറ്റിബിള് ട്രസ്റ്റും എയർ ഇന്ത്യ രൂപീകരിച്ചിട്ടുണ്ട്. അപകടത്തില് ജീവൻ നഷ്ടപ്പെട്ട എല്ലാവരുടെയും കുടുംബങ്ങള്ക്കൊപ്പം കമ്പനി നിലകൊള്ളുമെന്നും അവർക്ക് ഐകദാർഢ്യം പ്രഖ്യാപിക്കുകയാണ് തങ്ങളെന്നും എയർ ഇന്ത്യ അറിയിച്ചിട്ടുണ്ട്. ഇവയ്ക്ക് പുറമെ തകർന്ന ബിജെ മെഡിക്കല് കോളേജ് പുനർനിർമിച്ചു നല്കാനും എയർ ഇന്ത്യ തയ്യാറായിട്ടുണ്ട്.
ജൂണ് 12-നാണ് ഗുജറാത്തിലെ അഹമ്മദാബാദില് എയര് ഇന്ത്യ വിമാനം തകര്ന്നുവീണ് അപകടമുണ്ടായത്. 260 പേര്ക്കാണ് ദുരന്തത്തില് ജീവന് നഷ്ടമായത്. വിമാനത്തിലുണ്ടായിരുന്ന വിശ്വാസ് കുമാര് എന്നയാള് മാത്രമാണ് രക്ഷപ്പെട്ടത്. അഹമ്മദാബാദില് നിന്ന് ലണ്ടനിലേക്ക് പറന്നുയര്ന്ന വിമാനം നിമിഷങ്ങള്ക്കകം ബി ജെ മെഡിക്കല് കോളേജിലേയ്ക്ക് ഇടിച്ചിറങ്ങുകയായിരുന്നു. ഭൂരിഭാഗം മൃതദേഹങ്ങളും തിരിച്ചറിയാന് കഴിയാത്ത വിധം കത്തിക്കരിഞ്ഞ നിലയിലായിരുന്നു. തുടര്ന്ന് അഹമ്മദാബാദിലെ സിവില് ആശുപത്രിയില് ഡിഎന്എ പരിശോധന നടത്തിയശേഷം ബന്ധുക്കള്ക്ക് മൃതദേഹാവശിഷ്ടങ്ങള് വിട്ടുനല്കുകയായിരുന്നു.
SUMMARY: Ahmedabad plane crash: Air India begins compensation distribution to families of deceased
WhatsApp
Telegram
