കാസറഗോഡ്: കുമ്പള ഗവ. ഹയർ സെക്കൻഡറി സ്കൂള്‍ കലോത്സവത്തില്‍ അധ്യാപകർ തടഞ്ഞ പലസ്തീൻ ഐക്യദാർഢ്യ മൈം അതേ വേദിയില്‍ വീണ്ടും അവതരിപ്പിച്ചു. പൂർണമായും കലോത്സവ നിബന്ധനകള്‍ പാലിച്ചായിരുന്നു മൈം. വെള്ളിയാഴ്ച മൈം തടസ്സപ്പെടുത്തിയ അധ്യാപകർ ഇന്ന് സ്കൂളില്‍ എത്തിയില്ല.
കഴിഞ്ഞ ദിവസം മാറ്റി വെച്ച കലോത്സവം ഇന്ന് നടത്തുകയായിരുന്നു. അതിനിടെ, ഡിഡിഇ പൊതുവിദ്യഭ്യാസ ഡയറക്ടർക്ക് നല്‍കിയ റിപ്പോട്ടിനെതിരെ പ്രതിഷേധം ഉയരുന്നുണ്ട്. അധ്യാപകരെ സംരക്ഷിക്കുന്ന റിപ്പോർട്ടാണ് ഡിഡിഇ നല്‍കിയതെന്നാണ് ആരോപണം. വിദ്യാർഥികള്‍ക്കിടയില്‍ പ്രശ്നങ്ങള്‍ ഉണ്ടായതാണ് കലോത്സവം നിർത്തിവെക്കാൻ കാരണമെന്നായിരുന്നു ഡിഡിഇയുടെ റിപ്പോർട്ട്.
സംഘ്പരിവാർ അനുകൂല ദേശീയ അധ്യാപക പരിഷത്ത് അംഗം പ്രദീപ് കുമാർ, സുപ്രീത് എന്നിവർക്ക് പിന്തുണയുമായി യുവമോർച്ച സ്കൂളിലേക്ക് മാർച്ച്‌ നടത്തുകയും ചെയ്തു. സ്കൂളില്‍ വെള്ളിയാഴ്ചയാണ് ഫലസ്തീൻ ജനതയുടെ ദുരിതം വിഷയമാക്കിയുള്ള മൈം അധ്യാപകർ തടഞ്ഞത്. മൈം ഷോ പൂർത്തിയാവുന്നതിന് മുമ്പെ അധ്യാപകർ സ്റ്റേജില്‍ കയറി കർട്ടൻ താഴ്ത്തുകയായിരുന്നു.
SUMMARY: Solidarity with Palestine; Mime, stopped halfway by teacher, returns to stage
WhatsApp
Telegram
