ബെംഗളൂരു: മൈസൂരുവില്‍ ഇനി വേനല്‍ കാലത്തും കുടിവെള്ളം മുട്ടില്ല. ഉദ്ഘാട്‌നത്തിനൊരുങ്ങുകയാണ് കബനി പദ്ധതി. പ്രവൃത്തി ഉടന്‍ പൂര്‍ത്തീകരിച്ച് പദ്ധതി മുഖ്യമന്ത്രി സിദ്ധരമായ്യ ഉദ്ഘാടനം ചെയ്യുമെന്ന് എംഎല്‍എ ജിടി ദേവഗൗഡ അറിയിച്ചു. നഞ്ചന്‍കോടിനടുത്തുള്ള ബിദരഗോഡുവിലെ കബനി പദ്ധതി യാഥാര്‍ഥ്യമായാല്‍ മൈസൂരുവിന് പ്രതിദിനം 110 ദശലക്ഷം ലിറ്റര്‍ അധിക വെള്ളം ലഭിക്കും. ഇതോടെ വേനല്‍ക്കാലത്തുള്ള ജലക്ഷാമത്തിന് തീര്‍ത്തും പരിഹാരമാകും.
നിലവില്‍ കാവേരി നന്ദിയില്‍ നിന്നുള്ള കുടിവെള്ളമാണ് പൈപ്പുകളിലൂടെ നഗരത്തിലെ വീടുകളിലടക്കം എത്തിക്കുന്നത്. വേനല്‍ കാലത്ത് നദിയിലെ ജലക്ഷാമം കുടിവെള്ള വിതരണത്തെ ബാധിക്കാറുണ്ട്. കബനി പദ്ധതികൂടി യാഥാര്‍ഥ്യമായാല്‍ ഇതിന് തീര്‍ത്തും പരിഹാരമാകും.
കെമ്പാലുവിലെ ജലശുദ്ധീകരണ പ്ലാന്റിന്റെ ശേഷിക്കുന്ന കുറച്ച് ജോലികളാണ് ഇനി പൂര്‍ത്തിയാകാനുള്ളത്. പ്ലാന്റിനുള്ളില്‍ വൈദ്യുത ഉപകരണങ്ങള്‍ സ്ഥാപിക്കുന്നത് മാത്രമാണ് ശേഷിക്കുന്നത്.
2008-ല്‍ ആരംഭിച്ച കബനി കുടിവെള്ള പദ്ധതി പിന്നീട് നീണ്ടുപോകുകയായിരുന്നു. തുടര്‍ന്ന് കോര്‍പ്പറേഷന്‍, മൈസൂരു അര്‍ബന്‍ ഡെവലപ്‌മെന്റ് അതോറിറ്റിയുമായി സഹകരിച്ച് കര്‍ണാടക അര്‍ബന്‍ വാട്ടര്‍ സപ്ലൈ ആന്റ് ഡ്രെയിനേജ് ബോര്‍ഡ് രൂപീകരിച്ചാണ് പ്രവൃത്തി വേഗത്തിലാക്കിയത്.
പദ്ധതി പൂര്‍ത്തിയാകുമ്പോള്‍ ശ്രീരാംപുര, ജെപി നഗര്‍, കുവെമ്പുനഗര്‍, സരസ്വതിപുരം, അശോകപുരം, ശാരദാദേവിനഗര്‍, ടികെ ലേഔട്ട്, രാമകൃഷ്ണനഗര്‍, ദത്തഗല്ലി എന്നിവയുള്‍പ്പെടെ, കൃഷ്ണരാജ നിയമസഭാ മണ്ഡലത്തില്‍ ഉള്‍പ്പെടുന്ന എംസിസി പരിധിയിലെ 23 പ്രദേശങ്ങള്‍ക്ക് പ്രയോജനം ലഭിക്കും. കൂടാതെ, രമാഭായ് നഗര്‍, മഹാദേവപുര, യൂണിവേഴ്സിറ്റി ലേഔട്ട്, ലിംഗാംബുഡിപാളയ തുടങ്ങിയ എട്ട് സ്വകാര്യ ലേഔട്ടുകളിലും ആര്‍ടി നഗര്‍, സോമനാഥ ലേഔട്ട്, ബൊഗാഡി, രൂപനഗര്‍, ബിഇഎംഎല്‍ ലേഔട്ട്, ജുഡീഷ്യല്‍ ലേഔട്ട്, രവിശങ്കര്‍ ലേഔട്ട്, വിജയനഗര്‍ 4-ാം സ്റ്റേജ് തുടങ്ങിയ മറ്റ് അയല്‍പക്ക പ്രദേശങ്ങളിലും കൂടുതല്‍ വെള്ളം ലഭിക്കും.
SUMMARY: There is no shortage of drinking water in Mysuru; Kabani project set for inauguration
