ബെംഗളൂരു: ഗർഷോം ഫൗണ്ടേഷന്റെ 2025-ലെ അന്താരാഷ്ട്ര പുരസ്കാരങ്ങൾ പ്രഖ്യാപിച്ചു. സജീവ് നാരായണൻ (കുവൈത്ത്), അലക്സ് അബ്രഹാം (ഫിലിപ്പീൻസ്), സുചേത സതീഷ് (യുഎഇ), മുംഷാദ് മന്നംബേത്ത് (സിങ്കപ്പുർ), സാവിയോ ജെയിംസ് (അയർലൻഡ്), ഡി. സുധീരൻ (സിങ്കപ്പുർ) എന്നിവരാണ് ഇത്തവണത്തെ പുരസ്കാരത്തിന് അര്ഹരായത്. മികച്ച മലയാളിസംഘടനയ്ക്കുള്ള പുരസ്കാരത്തിന് റഷ്യയിലെ ഓൾ മോസ്കോ മലയാളി അസോസിയേഷൻ (അമ്മ) തിരഞ്ഞെടുക്കപ്പെട്ടു.
ഡിസംബർ അഞ്ചിന് രാത്രി ഏഴിന് സിങ്കപ്പുരിലെ ഓർക്കിഡ് കൺട്രി ക്ലബ്ബിൽ നടക്കുന്ന ചടങ്ങിൽ പുരസ്കാരങ്ങൾ സമ്മാനിക്കും. ഏഷ്യൻ പ്ലസ് ബിസിനസ് ഡയലോഗ് പരിപാടി വൈകുന്നേരം 4.30 മുതൽ നടക്കും. വിദേശസംരംഭകരും വിവിധ മേഖലകളിൽനിന്നുള്ള വിദഗ്ധരുമടക്കം 24 രാജ്യങ്ങളിൽനിന്നുള്ള പ്രതിനിധികൾ പങ്കെടുക്കും.
സ്വപ്രയത്നംകൊണ്ട് കേരളത്തിന് പുറത്ത് ജീവിതവിജയം നേടുകയും മലയാളികളുടെ യശസ്സുയർത്തുകയും ചെയ്ത മലയാളികളെ ആദരിക്കാൻ ലക്ഷ്യമിട്ട് 2002-ലാണ് ബെംഗളൂരു ആസ്ഥാനമായി ഗർഷോം ഫൗണ്ടേഷൻ സ്ഥാപിച്ചത്. ഇതുവരെ 100 പ്രവാസിമലയാളികളെയും 18 പ്രവാസിമലയാളി സംഘടനകളെയും ഗർഷോം പുരസ്കാരങ്ങൾ നൽകി ആദരിച്ചിട്ടുണ്ട്. മുൻവർഷങ്ങളിൽ ജപ്പാൻ, നോർവേ, മലേഷ്യ, കുവൈത്ത്, അർമേനിയ, യുഎഇ, ഇന്ത്യ, അസർബയ്ജാൻ എന്നീ രാജ്യങ്ങളിലെ വിവിധ നഗരങ്ങൾ ഗർഷോം പുരസ്കാരദാനച്ചടങ്ങുകൾക്കു ആതിഥ്യമരുളിയിട്ടുണ്ട്.
SUMMARY: Gershom Awards announced
