ഡല്‍ഹി: 2020-ലെ ഡല്‍ഹി കലാപത്തിന് പിന്നിലെ ഗൂഢാലോചനയില്‍ പങ്കുണ്ടെന്ന് ആരോപിച്ച്‌ യുഎപിഎ ചുമത്തപ്പെട്ട് ജയിലില്‍ കഴിയുന്ന മുൻ ജെഎൻയു വിദ്യാർഥികളായ ഉമർ ഖാലിദ്, ഷെർജില്‍ ഇമാം എന്നിവരുടെ ജാമ്യാപേക്ഷകള്‍ സുപ്രീം കോടതി തള്ളി. ജസ്റ്റിസുമാരായ അരവിന്ദ് കുമാർ, എൻ.വി.അഞ്ജാരിയ എന്നിവരടങ്ങിയ ബെഞ്ചാണ് വിധി പ്രസ്താവിച്ചത്.
കഴിഞ്ഞ അഞ്ച് വർഷമായി വിചാരണ കൂടാതെ ജയിലില്‍ കഴിയുകയാണെന്നും തങ്ങള്‍ക്കെതിരെയുള്ള ആരോപണങ്ങള്‍ പ്രഥമദൃഷ്ട്യാ നിലനില്‍ക്കുന്നതല്ലെന്നുമുള്ള പ്രതികളുടെ വാദം കോടതി അംഗീകരിച്ചില്ല. നേരത്തെ സെപ്റ്റംബറില്‍ ഇവരുടെ ജാമ്യാപേക്ഷകള്‍ ഡല്‍ഹി ഹൈക്കോടതി തള്ളിയിരുന്നു. ഇതിനെ ചോദ്യം ചെയ്തുകൊണ്ടാണ് പ്രതികള്‍ സുപ്രീം കോടതിയെ സമീപിച്ചത്.
കലാപം പെട്ടെന്നുണ്ടായ ഒന്നല്ലെന്നും കൃത്യമായ ആസൂത്രണത്തോടെ നടന്ന ഒന്നാണെന്നും കോടതി നിരീക്ഷിച്ചു. പ്രതികള്‍ക്കെതിരെയുള്ള ആരോപണങ്ങള്‍ ഗൗരവമുള്ളതാണെന്നും യുഎപിഎ നിയമപ്രകാരമുള്ള ജാമ്യവ്യവസ്ഥകള്‍ മറികടക്കാൻ ഇവർക്ക് സാധിച്ചിട്ടില്ലെന്നും കോടതി വ്യക്തമാക്കി. കപില്‍ സിബല്‍, അഭിഷേക് മനു സിങ്‌വി തുടങ്ങിയ പ്രമുഖ അഭിഭാഷകരാണ് പ്രതികള്‍ക്കായി ഹാജരായത്.
നീണ്ട കാലത്തെ തടവ് ജാമ്യം ലഭിക്കാനുള്ള അവകാശമായി കാണാനാവില്ലെന്ന് പ്രോസിക്യൂഷൻ വാദിച്ചു. പൗരത്വ ഭേദഗതി നിയമത്തിനെതിരെ (സിഎഎ) നടന്ന പ്രതിഷേധങ്ങളുടെ മറവില്‍ ഡല്‍ഹിയില്‍ കലാപം ആസൂത്രണം ചെയ്തു എന്നതാണ് ഇവർക്കെതിരെയുള്ള കുറ്റം.
2020 ഫെബ്രുവരിയില്‍ നടന്ന കലാപത്തില്‍ 53 പേർ കൊല്ലപ്പെടുകയും എഴുന്നൂറോളം പേർക്ക് പരുക്കേല്‍ക്കുകയും ചെയ്തിരുന്നു. ഉമർ ഖാലിദ്, ഷെർജില്‍ ഇമാം എന്നിവർക്കൊപ്പം ഗുല്‍ഫിഷ ഫാത്തിമ, മീരാൻ ഹൈദർ ഉള്‍പ്പെടെയുള്ള മറ്റ് ഏഴ് പേരുടെ ഹർജികളും കോടതി തള്ളിയിട്ടുണ്ട്.
SUMMARY: Delhi riots conspiracy case: No bail for Umar Khalid and Sherjeel Imam
