ചെന്നൈ: ഷോര്ട്ട് ഫിലിം നിര്മിച്ച് നല്കാമെന്ന് വാഗ്ദാനം ചെയ്ത് യുവാവിനെ കബളിപ്പിച്ച കേസില് നടി വര്ഷിണി അറസ്റ്റില്. ടിവി റിയാലിറ്റി ഷോയിലൂടെ ശ്രദ്ധേയയായ നടി യുവാവില് നിന്നും അഞ്ചുലക്ഷം രൂപ തട്ടിയെടുത്തെന്നാണ് കേസ്. വർഷിണിയുടെ വാഗ്ദാനത്തില് വിശ്വസിച്ച പരാതിക്കാരൻ 5 ലക്ഷം രൂപ നടിക്ക് നല്കിയതായും എന്നാല് പിന്നീട് പണം തിരികെ ചോദിച്ചപ്പോള് ഭീഷണിപ്പെടുത്തിയതായും പോലീസ് പറയുന്നു.
മാത്രമല്ല 50,000 രൂപയും രണ്ട് മൊബൈല് ഫോണുകളും ബലമായി താരം യുവാവില് നിന്നും തട്ടിയെടുത്തെന്നും പോലീസ് കണ്ടെത്തി. വഞ്ചന, പിടിച്ചുപറി തുടങ്ങിയ കുറ്റങ്ങള് ചുമത്തി വർഷിണിക്കും മറ്റ് മൂന്ന് പേർക്കുമെതിരെ പോലീസ് കേസ് റജിസ്റ്റർ ചെയ്തിട്ടുണ്ട്. ചെന്നൈ പോലീസാണ് നടിയെയും കൂട്ടാളികളെയും നാടകീയമായി പിടികൂടിയത്. നടിക്ക് പണം കൈമാറി മാസങ്ങള് കഴിഞ്ഞിട്ടും ഷോര്ട്ട് ഫിലിമുമായി ബന്ധപ്പെട്ട ജോലിയൊന്നും ആരംഭിക്കാത്തതിനെ തുടര്ന്നാണ് യുവാവ് പണം തിരികെ ചോദിച്ചത്.
തുടർന്ന് പണം തിരികെ നല്കാനെന്ന വ്യാജേന യുവാവിനെ വിളിച്ചുവരുത്തിയ നടി, ഇയാളെ ഭീഷണിപ്പെടുത്തുകയും ഇയാളുടെ പക്കല് നിന്നും 50,000 രൂപയും രണ്ട് വിലകൂടിയ മൊബൈല് ഫോണുകളും ബലമായി പിടിച്ചെടുക്കുകയുമായിരുന്നു. സംഭവത്തില് ഉള്പ്പെട്ട ബാക്കി പ്രതികള്ക്കായി അന്വേഷണം ഊർജിതമാക്കിയതായി പോലീസ് അറിയിച്ചു.
SUMMARY: Actress Varshini Venkat arrested for swindling ₹5 lakh from a young man by promising to produce a short film
