ആറാട്ടുപുഴ: ആറാട്ടുപുഴയില് അമീബിക് മസ്തിഷ്കജ്വരം സ്ഥിരീകരിച്ചു. ആറാട്ടുപുഴ കിഴക്കേക്കര സ്വദേശിനിയായ 40-കാരിക്കായണ് അമീബിക് മസ്തിഷ്കജ്വരം ബാധിച്ചതായി കണ്ടെത്തിയത്. നിലവില് തിരുവനന്തപുരം മെഡിക്കല് കോളേജ് ആശുപത്രിയില് ചികിത്സയിലുള്ള ഇവരുടെ ആരോഗ്യനില തൃപ്തികരമാണെന്ന് അധികൃതർ അറിയിച്ചു.
സാധാരണയായി മലിനമായ ജലാശയങ്ങളില് കുളിക്കുന്നതിലൂടെയാണ് ഈ രോഗം പകരുന്നത്. എന്നാല് താൻ അത്തരത്തില് ജലാശയങ്ങളില് ഇറങ്ങിയിട്ടില്ലെന്ന് രോഗി വ്യക്തമാക്കിയതോടെ, രോഗബാധയുടെ ഉറവിടം കണ്ടെത്താൻ ആരോഗ്യവകുപ്പ് വിശദമായ പഠനം ആരംഭിച്ചിട്ടുണ്ട്. രണ്ടര വർഷമായി തളർവാതം ബാധിച്ച് ചികിത്സയിലായിരുന്ന ഇവർ, തുടർച്ചികിത്സയുടെ ഭാഗമായി നടത്തിയ രക്തപരിശോധനയിലാണ് രോഗബാധ കണ്ടെത്തിയത്.
രോഗം സ്ഥിരീകരിച്ചതിനെത്തുടർന്ന് ആറാട്ടുപുഴ പഞ്ചായത്തില് കടുത്ത നിയന്ത്രണങ്ങളും ജാഗ്രതാനിർദേശങ്ങളും പുറപ്പെടുവിച്ചു. ആരോഗ്യവകുപ്പിന്റെയും പഞ്ചായത്തിന്റെയും നേതൃത്വത്തില് വീടുകള് സന്ദർശിച്ച് ബോധവത്കരണം നടത്തുകയും പ്രതിരോധ മാർഗ്ഗങ്ങള് വിവരിക്കുന്ന ലഘുലേഖകള് വിതരണം ചെയ്യുകയും ചെയ്യുന്നുണ്ട്.
പ്രദേശത്തെ ജലസ്രോതസ്സുകളില് നിന്നുളള സാമ്പിളുകള് ശേഖരിച്ച് പരിശോധനയ്ക്ക് അയച്ചു. കുടിവെള്ള സ്രോതസ്സുകളില് സൂപ്പർ ക്ലോറിനേഷൻ നടത്താനും കെട്ടിക്കിടക്കുന്ന വെള്ളത്തില് കുളിക്കുന്നത് ഒഴിവാക്കാനും അധികൃതർ കർശന നിർദേശം നല്കി. ഉച്ചഭാഷിണി വഴിയുള്ള ജാഗ്രതാ അറിയിപ്പുകളും പ്രദേശത്ത് തുടരുന്നുണ്ട്.
SUMMARY: Amebic encephalitis confirmed in Arattupuzha
