പെരിന്തല്മണ്ണ: സംസ്ഥാനത്ത് വീണ്ടും നിപ മരണം. പാലക്കാട് മണ്ണാര്ക്കാട് സ്വദേശിയായ അമ്പതുകാരനാണ് പെരിന്തല്മണ്ണയിലെ സ്വകാര്യ ആശുപത്രിയില് ശനിയാഴ്ച വൈകീട്ട് മരിച്ചത്. മഞ്ചേരി മെഡിക്കല്കോളേജില് നടത്തിയ പ്രാഥമിക പരിശോധനയില് നിപ സ്ഥിരീകരിച്ചു.മൃതദേഹം പ്രോട്ടോക്കോൾ പാലിച്ച് സംസ്കരിക്കുമെന്ന് ആരോഗ്യ മന്ത്രി വീണ ജോർജ് അറിയിച്ചു.
മണ്ണാര്ക്കാട്ടെ സ്വകാര്യ ആശുപത്രിയില്നിന്ന് റഫര് ചെയ്ത രോഗി കടുത്ത ശ്വാസതടസ്സത്തോടെ വെള്ളിയാഴ്ച വൈകുന്നേരമാണ് പെരിന്തല്മണ്ണയിലെ സ്വകാര്യ ആശുപത്രിയിലെത്തിയത്. നിപ ലക്ഷണങ്ങളുമായി സാമ്യം തോന്നിയതിനാല് പ്രത്യേകം സജ്ജീകരിച്ച ക്രിട്ടിക്കല് കെയര് യൂണിറ്റില് ഐസൊലേറ്റ് ചെയ്താണ് ചികിത്സിച്ചത്.ശനിയാഴ്ച അഞ്ചുമണിയോടെ മരിച്ചു.
നേരത്തെ മക്കരപ്പറമ്പ് സ്വദേശിയായ യുവതിയും നിപ ബാധിച്ചു മരിച്ചിരുന്നു. സംസ്ഥാനത്ത് 497 പേരാണ് നിലവില് നിപ സമ്പർക്ക പട്ടികയിലുള്ളത്.
SUMMARY: Another Nipah death; Mannarkkad native who died confirmed to have the disease
