ഡല്‍ഹി: കോക്രോച്ച്‌ ജനത പാര്‍ട്ടി (സിജെപി) വീണ്ടും സമരത്തിനൊരുങ്ങുന്നു. ജന്തര്‍ മന്തര്‍ സമരവുമായി ബന്ധപ്പെട്ട് ജൂലൈ 25ന് നല്‍കിയ വാഗ്ദാനങ്ങള്‍ പാലിക്കുന്നതില്‍ കേന്ദ്രസര്‍ക്കാര്‍ പരാജയപ്പെട്ടെന്നും ഇതില്‍ പ്രതിഷേധിച്ച്‌ സെപ്റ്റംബര്‍ 5ന് രാജ്യവ്യാപകമായി സമാധാനപരമായ സമരം നടത്തുമെന്നും സിജെപി വാര്‍ത്താക്കുറിപ്പില്‍ അറിയിച്ചു. സെപ്റ്റംബര്‍ 5ന് ഇന്ത്യാ ഗേറ്റില്‍ ആരംഭിക്കുന്ന സമരം തുടര്‍ന്ന് ഡല്‍ഹി പോലീസ് ആസ്ഥാനത്തേക്ക് നീങ്ങും.
നീറ്റ് പരീക്ഷാ ക്രമക്കേടിനെ തുടര്‍ന്ന് ജീവനൊടുക്കിയ വിദ്യാര്‍ഥികളുടെയും പോലീസ് ആക്രമണത്തില്‍ പരുക്കേറ്റ വിദ്യാര്‍ഥികളുടെയും കുടുംബങ്ങളും യുവാക്കളുടെ സംഘടനകളും യുവാക്കളും സമരത്തില്‍ പങ്കാളികളാകുമെന്നാണ് കരുതുന്നതെന്നും സിജെപി വ്യക്തമാക്കി.
”സിജെപി ദേശീയ വര്‍ക്കിങ് കമ്മിറ്റി യോഗത്തിലാണു സമരം വീണ്ടും തുടങ്ങാനുള്ള തീരുമാനമെടുത്തത്. രാജ്യത്തെ യുവാക്കള്‍ക്കു നല്‍കിയ വാഗ്ദാനങ്ങളില്‍ കേന്ദ്ര സര്‍ക്കാരും ബിജെപി ഭരിക്കുന്ന സംസ്ഥാനങ്ങളും നടത്തിയ പുരോഗതി വിലയിരുത്തിയശേഷമായിരുന്നു തീരുമാനം. പൊതുജനങ്ങള്‍ക്കു മുന്നില്‍ വാഗ്ദാനങ്ങള്‍ നല്‍കി, ഒരു മാസം പിന്നിട്ടിട്ടും സര്‍ക്കാര്‍ വാക്കു പാലിക്കാന്‍ തയാറായിട്ടില്ല.
ഇക്കാര്യത്തില്‍ സിജെപിക്ക് ആശങ്കയുണ്ട്. വാഗ്ദാനങ്ങള്‍ നടപ്പാക്കുന്നതിനു പകരം, സര്‍ക്കാര്‍ നടപടി വൈകിപ്പിക്കുകയാണ്. ഓഗസ്റ്റ് 18ന്, രാജ്യത്താകമാനം വിദ്യാര്‍ഥി പ്രക്ഷോഭത്തിനെതിരെ റജിസ്റ്റര്‍ ചെയ്ത എഫ്‌ഐആറുകളുടെ പട്ടിക സുപ്രീംകോടതി സര്‍ക്കാരിനോട് ആവശ്യപ്പെട്ടിരുന്നു. എന്നാല്‍ ഇക്കാര്യത്തില്‍ കേന്ദ്ര സര്‍ക്കാരിനു കൃത്യമായ ഉത്തരമുണ്ടായിരുന്നില്ല. കേന്ദ്ര സര്‍ക്കാര്‍ സിജെപിക്ക് എഴുതി തയാറാക്കി നല്‍കിയ വാക്കുകളും പാലിച്ചിട്ടില്ല.” സിജെപി ആരോപിച്ചു.
SUMMARY: Central Government failed to keep its word; CJP announces fresh protest
