ആലപ്പുഴ: നിയമസഭാ തിരഞ്ഞെടുപ്പില്‍ കോണ്‍ഗ്രസ് വൻ വിജയം നേടുമെന്ന് മുതിർന്ന നേതാവ് എ.കെ. ആന്റണി. പിണറായി ഭരണം അവസാനിപ്പിക്കണം എന്നാണ് എല്ലാവരുടെയും ആഗ്രഹമെന്നും ഭരണമാറ്റം ഉറപ്പാണെന്നും ആന്റണി പറഞ്ഞു. ഇടതുമുന്നണിയിലും എൻ.ഡി.എയിലും ഇപ്പോഴും സ്ഥാനാർത്ഥി നിർണ്ണയം പൂർത്തിയാകാത്ത ഇടങ്ങളുണ്ടെന്നും കോണ്‍ഗ്രസിനുള്ളില്‍ പഴയകാലത്തെ അപേക്ഷിച്ച്‌ വലിയ പൊട്ടിത്തെറികള്‍ ഒന്നുമില്ലെന്നും അദ്ദേഹം വ്യക്തമാക്കി.
തിരുവനന്തപുരത്ത് ചാണ്ടി ഉമ്മൻ അദ്ദേഹത്തെ സന്ദർശിച്ചതിന് പിന്നാലെ മാധ്യമങ്ങളോട് സംസാരിക്കുകയായിരുന്നു അദ്ദേഹം. “ചാണ്ടി ഉമ്മൻ റെക്കോർഡ് ഭൂരിപക്ഷത്തില്‍ ജയിക്കും. ചുരുങ്ങിയ കാലം കൊണ്ട് ഉമ്മൻ ചാണ്ടിയേക്കാള്‍ വലിയ ജനകീയനായി അദ്ദേഹം മാറി. അദ്ദേഹത്തിന്റെ സൈക്കിള്‍ യാത്ര എല്ലാവർക്കും മാതൃകയാണ്,” ആന്റണി പറഞ്ഞു. തിരുവനന്തപുരം മണ്ഡലത്തിലെ യു.ഡി.എഫ് സ്ഥാനാർത്ഥി സി.പി. ജോണ്‍ കേരളത്തിന്റെ സ്വത്താണെന്നും അദ്ദേഹം വലിയ ഭൂരിപക്ഷത്തില്‍ വിജയിക്കുമെന്നും ആന്റണി ആത്മവിശ്വാസം പ്രകടിപ്പിച്ചു.
സംസ്ഥാനത്ത് ഇത്തവണ ഭരണമാറ്റം ഉറപ്പാണ്. പിണറായി വിജയന്റെ ഭരണം അവസാനിപ്പിക്കണമെന്നാണ് ജനങ്ങള്‍ ആഗ്രഹിക്കുന്നത്. ഈ തിരഞ്ഞെടുപ്പോടെ ബി.ജെ.പി.യുടെ അടിത്തറ ഇളകുമെന്നും അദ്ദേഹം കൂട്ടിച്ചേർത്തു. പ്രായമായവർക്ക് വീട്ടിലിരുന്ന് വോട്ട് ചെയ്യാനുള്ള സൗകര്യമുണ്ടെങ്കിലും താൻ നേരിട്ട് പോളിംഗ് ബൂത്തിലെത്തി തന്നെ വോട്ട് രേഖപ്പെടുത്തുമെന്ന് അദ്ദേഹം വ്യക്തമാക്കി.
SUMMARY: ‘Pinarayi’s rule must end, change of government is certain in Kerala’: A.K. Antony
