ബെംഗളൂരു: കാർ മരത്തിലിടിച്ച് മൂന്ന് എഞ്ചിനീയറിങ് വിദ്യാർഥികൾക്ക് ദാരുണാന്ത്യം. ശനിയാഴ്ച പുലർച്ചെ ബംഗാർപേട്ട് മെയിൻ റോഡിലെ സഹകാർ നഗറിലാണ് സംഭവം. ഇവർ സഞ്ചരിച്ചിരുന്ന ഓഡി കാർ റോഡരികിലെ മരത്തിലിടിക്കുകയായിരുന്നു. കാറിലുണ്ടായിരുന്ന മറ്റൊരു വിദ്യാർഥിക്ക് സാരമായി പരുക്കേറ്റു. ഹാസൻ സ്വദേശി ഹർഷവർധൻ, ബെള്ളാരി സ്വദേശി ബസവരാജ്, കാർ ഓടിച്ചിരുന്ന ബംഗാർപേട്ട സ്വദേശി പ്രജ്വൽ എന്നിവരാണ് മരിച്ചത്. ബംഗാർപേട്ട് സ്വദേശിയായ സായി ഗഗനാണ് പരുക്കേറ്റത്.
ബെംഗളൂരുവിൽ നിന്ന് ബംഗാർപേട്ടിലേക്ക് വരികയായിരുന്നു ഇവർ. ആഗസ്റ്റ് 11ന് നടക്കാനിരിക്കുന്ന സായി ഗഗൻ്റെ സഹോദരിയുടെ വിവാഹത്തിന് ക്ഷണക്കത്ത് വിതരണം ചെയ്ത് മടങ്ങുന്നതിനിടെയാണ് അപകടമുണ്ടായത്. ബെംഗളൂരുവിലെ സ്വകാര്യ എഞ്ചിനീയറിംഗ് കോളേജിലെ വിദ്യാർഥികളാണ് എല്ലാവരും. മുമ്പിലുണ്ടായിരുന്ന ട്രക്കിനെ മറികടക്കാൻ ശ്രമിക്കുന്നതിനിടെയാണ് അപകടമുണ്ടായത്. ഇടിയുടെ ആഘാതത്തിൽ കാർ പൂർണമായും തകർന്നു. ട്രക്കിനെ മറികടക്കാൻ ശ്രമിക്കുന്നതിനിടെ ഡ്രൈവറുടെ നിയന്ത്രണം നഷ്ടപ്പെട്ടതാണ് അപകടത്തിന് കാരണമായതെന്ന് പോലീസ് പറഞ്ഞു. കോലാർ റൂറൽ പോലീസ് സംഭവത്തിൽ കേസെടുത്തു.
TAGS: KARNATAKA | ACCIDENT
SUMMARY: 3 engineering students dead after car crashes into tree in Kolar, one miraculously survives
