കൊച്ചി: എളമക്കരയില് അച്ഛൻ മകളെ വിഷം നല്കി കൊലപ്പെടുത്തി ആത്മഹത്യ ചെയ്ത സംഭവത്തില്, പെണ്കുട്ടിയുടെ പോസ്റ്റ്മോർട്ടം റിപ്പോർട്ടിലൂടെ പുറത്തുവരുന്നത് ഞെട്ടിപ്പിക്കുന്ന വിവരങ്ങള്. പത്തു വയസ്സുകാരിയായ പെണ്കുട്ടി ഒരു വർഷത്തോളമായി ക്രൂരമായ ലൈംഗിക പീഡനത്തിന് ഇരയായിരുന്നതായും, മരണത്തിന് തൊട്ടുമുമ്പുള്ള മണിക്കൂറുകളിലും പീഡനം നടന്നതായും പോസ്റ്റ്മോർട്ടം റിപ്പോർട്ട് വ്യക്തമാക്കുന്നു.
കഴിഞ്ഞ മാസം 16-നായിരുന്നു സംഭവം നടന്നത്. കൊച്ചിയിലെ സ്വകാര്യ സ്ഥാപനത്തില് ജോലി കഴിഞ്ഞ് അമ്മ തിരികെ എത്തിയപ്പോഴാണ് കുട്ടിയെ വിഷം ഉള്ളില് ചെന്ന് മരിച്ച നിലയിലും പിതാവിനെ തൂങ്ങിമരിച്ച നിലയിലും കണ്ടെത്തിയത്. സംഭവത്തില് പോക്സോ (POCSO) വകുപ്പുകള് പ്രകാരം എളമക്കര പോലീസ് കേസെടുത്ത് അന്വേഷണം ഊർജിതമാക്കിയിട്ടുണ്ട്.
കുട്ടിയെ നിരന്തരം പീഡിപ്പിച്ചത് ആരാണെന്ന കാര്യത്തില് പോലീസ് അന്വേഷണം ശക്തമാക്കിയിരിക്കുകയാണ്. മകള് പീഡിപ്പിക്കപ്പെട്ട വിവരത്തെക്കുറിച്ച് തനിക്ക് അറിവില്ലെന്നാണ് അമ്മ പോലീസിന് നല്കിയ മൊഴി. ആത്മഹത്യ ചെയ്ത പിതാവ് തന്നെയാണോ അതോ മറ്റാരെങ്കിലുമാണോ ഈ ക്രൂരതയ്ക്ക് പിന്നിലെന്ന് കണ്ടെത്താനുള്ള ശ്രമത്തിലാണ് അന്വേഷണസംഘം.
കുടുംബത്തിലെ സാഹചര്യങ്ങളും ഫോണ് രേഖകളും പോലീസ് വിശദമായി പരിശോധിച്ചു വരികയാണ്. പിതാവിന്റെ ആത്മഹത്യയും മകളുടെ പീഡനവും തമ്മിലുള്ള ബന്ധം പുറത്തുകൊണ്ടുവരുന്നതോടെ മാത്രമേ ഈ ദാരുണമായ സംഭവത്തിലെ സത്യാവസ്ഥ പൂർണ്ണമായും വ്യക്തമാവുകയുള്ളൂ.
SUMMARY: Father kills daughter, commits suicide; girl was tortured for a year
