കോട്ടയം: ഡിവൈഎഫ്‌ഐയുടെ ആദ്യ വനിതാ സംസ്ഥാന പ്രസിഡന്റായി ചിന്താ ജെറോം എത്തിയേക്കും. സംഘടനയുടെ കേന്ദ്രകമ്മിറ്റിയംഗവും സിപിഎം സംസ്ഥാന കമ്മിറ്റിയംഗവുമാണ് നിലവില്‍ ചിന്താ ജെറോം. കല്ല്യാശ്ശേരി എംഎല്‍എ എം വിജിന് ആകും സംസ്ഥാന സെക്രട്ടറിയാവുക. രാഹുല്‍ ട്രഷറര്‍ ആകും കഴിഞ്ഞദിവസം ചേർന്ന ഡിവൈഎഫ്‌ഐ ഫ്രാക്ഷൻ യോഗത്തിലാണ് തീരുമാനം.
സി.പി.എം. സംസ്ഥാന സെക്രട്ടറി എം.വി. ഗോവിന്ദനാണ് ഫ്രാക്ഷൻ യോഗത്തില്‍ പാനല്‍ അവതരിപ്പിച്ചത്. അടുത്തദിവസം ചേരുന്ന സി.പി.എം. സംസ്ഥാന സെക്രട്ടേറിയറ്റ്, പാനല്‍ അംഗീകരിക്കുമെന്നാണ് വിവരം. ഓഗസ്റ്റ് 19 മുതല്‍ 22 വരെ തൃശ്ശൂരില്‍ നടക്കുന്ന സംസ്ഥാന സമ്മേളനമാണ് ഭാരവാഹികളെ ഔദ്യോഗികമായി തിരഞ്ഞെടുക്കേണ്ടത്. ഫ്രാക്ഷൻ ചേർന്ന് ഭാരവാഹികളെ തിരഞ്ഞെടുക്കുന്ന രീതിയാണ് പൊതുവേ അനുവർത്തിച്ചുവരുന്നത്.
എങ്കിലും തിരഞ്ഞെടുപ്പ് രീതി സംബന്ധിച്ച്‌ കണ്ണൂരില്‍ നിന്നുള്ള ഒരംഗം വിമർശനമുന്നയിച്ചു. ഭാരവാഹികളാകുന്നതില്‍ 38 വയസ് പ്രായപരിധി കർശനമാക്കിയിട്ടുണ്ട്. ഇതാണ് വിജിന് തുണയായത്. എന്നാല്‍, കൃത്യസമയത്ത് സംഘടനാ സമ്മേളനങ്ങളില്‍ നടക്കാത്തതിനാലാണ് പ്രായപരിധിയുടെ പേരില്‍ പലരും ഒഴിവാക്കപ്പെടുന്നതെന്നായിരുന്നു വിമർശനം.
SUMMARY: Chintha Jerome becomes DYFI’s first female state president; Vijin named secretary
