മുംബൈ: മുംബൈയിലെ വൈല് പാർലെ (വെസ്റ്റ്) ബാപ്റ്റിസ്റ്റ റോഡിലുള്ള പന്ത്രണ്ടുനില കെട്ടിടത്തില് വൻ തീപിടിത്തം. അപകടത്തില് 23 വയസുകാരിയായ യുവതിയും രണ്ട് വയസുള്ള കുഞ്ഞും മരിച്ചു. അങ്കിത (23), അബീർ (രണ്ട്) എന്നിവർക്കാണ് ജീവൻ നഷ്ടമായത്. തീപിടിത്തത്തില് പാർഥ് (32), ഹിരണ് (64), യശസ്വി, അഭിഷേക് എന്നിവർക്ക് ഗുരുതരമായി പരുക്കേറ്റു. ഇവരെ ആശുപത്രിയിലേക്ക് മാറ്റിയിട്ടുണ്ട്.
ഇന്നലെ രാത്രി പത്ത് മണിക്ക് ശേഷമായിരുന്നു അപകടം. 12 നിലകളുള്ള കെട്ടിടത്തിന്റെ പതിനൊന്നാം നിലയിലാണ് തീ പടർന്നുപിടിച്ചത്. തീ അതിവേഗത്തില് പടർന്നുപിടിച്ചതിനെ തുടർന്ന് പതിനൊന്നാം നിലയില് കുടുങ്ങിപ്പോയ നിരവധി നിവാസികളെ മുംബൈ ഫയർ ബ്രിഗേഡ് ഉദ്യോഗസ്ഥർ ചേർന്നാണ് രക്ഷപ്പെടുത്തിയത്. രാത്രി 10:16 ഓടെ ഇതിനെ ‘ലെവല് 2’ ദുരന്തമായി പ്രഖ്യാപിച്ചു.
രക്ഷാപ്രവർത്തനം നടത്തുന്നതിനിടെ ആറുപേർക്ക് പരുക്കേറ്റു. ഇതില് 2പേരെ ബോധരഹിതരായ നിലയില് കണ്ടെത്തുകയുമായിരുന്നു. പരുക്കേറ്റവരെ ഉടൻ തന്നെ ബാന്ദ്രയിലെ നാനാവതി ആശുപത്രിയില് എത്തിച്ചെങ്കിലും രണ്ടുപേരുടെ ജീവൻ രക്ഷിക്കാനായില്ല. ചികിത്സയിലുള്ള ബാക്കി നാലുപേരുടെ ആരോഗ്യനില തൃപ്തികരമാണ്.
SUMMARY: Major fire at a residential complex in Mumbai; 2-year-old child and a young woman die
