ബെംഗളൂരു: ബന്നാർഘട്ട ദേശീയ പാർക്കിലൂടെ 6.68 കിലോമീറ്റർ ദൂരത്തിൽ ദേശീയ പാത നിർമിക്കാൻ അനുമതി നൽകുന്നതു സംബന്ധിച്ച് വനം വകുപ്പ് ഉടൻ അന്തിമ തീരുമാനമെടുക്കും. ഇതിനായി ദേശീയ പാത അതോറിറ്റി (എൻഎച്ച്എഐ) സമർപ്പിച്ച വൈൽഡ് ലൈഫ് മിറ്റിഗേഷൻ പ്ലാൻ വനം വകുപ്പ് പരിശോധിച്ചു വരികയാണ്. അനുമതി ലഭിച്ചാൽ ഉടൻ പാതയുടെ നിർമാണം ആരംഭിക്കുമെന്ന് എൻഎച്ച്എഐ അറിയിച്ചു.
സാറ്റ്ലൈറ്റ് ടൗൺഷിപ്പ് റിങ് റോഡിന്റെ രണ്ടാം ഘട്ടത്തിന്റെ ഭാഗമായാണ് 6 വരി ദേശീയ പാത നിർമിക്കുന്നത്. രാമനഗരയെ പെഡ്ഡമദഗൊണ്ഡപള്ളി റോഡുമായി ബന്ധിപ്പിക്കാനാണ് ബന്നാർഘട്ടെയിൽ 27 ഏക്കർ വനഭൂമി ആവശ്യമായി വന്നത്.
അന്തർസംസ്ഥാന യാത്ര ബെംഗളൂരു നഗര ഗതാഗതത്തെ ബാധിക്കാത്ത രീതിയിൽ ക്രമീകരിക്കാനാണ് പദ്ധതിയിലൂടെ ഉദ്ദേശിക്കുന്നത്. നഗരത്തിലെ ഗതാഗത കുരുക്കിനു പരിഹാരം കാണാനും ഇതു സഹായിക്കുമെന്ന് പ്രതീക്ഷിക്കുന്നു.
SUMMARY: Final decision about Highway through Bannerghatta park will take forest department soon.
