ബെംഗളൂരു: നഗരത്തിലെ ഭക്ഷണശാലകളിലും ഭക്ഷ്യവസ്തുക്കൾ കൈകാര്യം ചെയ്യുന്ന സ്ഥാപനങ്ങളിലും ഭക്ഷ്യസുരക്ഷാ വകുപ്പ് പരിശോധന കൂടുതൽ ശക്തമാക്കുന്നു. അടുത്തിടെ നടത്തിയ പരിശോധനകളിൽ പല സ്ഥാപനങ്ങളിലും പഴകിയ ഭക്ഷണം, വൃത്തിഹീനമായ സാഹചര്യത്തിൽ സൂക്ഷിച്ച ഭക്ഷ്യവസ്തുക്കൾ, ശുചിത്വത്തിലെ വീഴ്ചകൾ എന്നിവ കണ്ടെത്തിയതിനെ തുടർന്നാണ് നടപടി ശക്തമാക്കുന്നത്.
ഭക്ഷണം തയ്യാറാക്കുന്നതും സൂക്ഷിക്കുന്നതും വിതരണം ചെയ്യുന്നതും ഉൾപ്പെടെയുള്ള ഘട്ടങ്ങളിൽ സുരക്ഷാ മാനദണ്ഡങ്ങൾ പാലിക്കുന്നുണ്ടോയെന്ന് ഉദ്യോഗസ്ഥർ പരിശോധിക്കും. നിയമലംഘനം കണ്ടെത്തുന്ന സ്ഥാപനങ്ങൾക്കെതിരെ പിഴ ചുമത്തുന്നതിന് പുറമെ ആവശ്യമായ സാഹചര്യങ്ങളിൽ സ്ഥാപനങ്ങൾ അടച്ചുപൂട്ടുന്നതുൾപ്പെടെയുള്ള നടപടികളും സ്വീകരിക്കും.
ഭക്ഷണശാലകൾക്ക് പുറമെ വേഗത്തിലുള്ള ഭക്ഷ്യവിതരണ സ്ഥാപനങ്ങളുടെ ഗോഡൗണുകളിലും പരിശോധന തുടരും. ഭക്ഷ്യവസ്തുക്കളുടെ സംഭരണസ്ഥലത്തെ ശുചിത്വം, കാലാവധി കഴിഞ്ഞ ഉൽപ്പന്നങ്ങളുടെ സാന്നിധ്യം, ഭക്ഷണം സൂക്ഷിക്കുന്ന രീതി എന്നിവയും പരിശോധനയുടെ ഭാഗമാകും.
പൊതുജനങ്ങളുടെ ആരോഗ്യസുരക്ഷ ഉറപ്പാക്കുന്നതിനായി വരും ദിവസങ്ങളിലും പരിശോധന തുടരുമെന്ന് ഭക്ഷ്യസുരക്ഷാ വകുപ്പ് അറിയിച്ചു. ഭക്ഷണത്തിന്റെ ഗുണനിലവാരത്തിൽ വീഴ്ച വരുത്തുന്ന സ്ഥാപനങ്ങൾക്കെതിരെ കർശന നടപടി സ്വീകരിക്കുമെന്നും അധികൃതർ വ്യക്തമാക്കി.
SUMMARY: Food safety inspections to be strengthened in the city
