ബെംഗളൂരു: കർണാടകയിൽ പാലിന്റെയും പാലുൽപ്പന്നങ്ങളുടെയും ഗുണനിലവാര പരിശോധന ശക്തമാക്കി ഭക്ഷ്യസുരക്ഷാ വിഭാഗം. സംസ്ഥാനത്തുടനീളം 23 പ്രത്യേക സംഘങ്ങളെ നിയോഗിച്ചാണ് പരിശോധന നടത്തുന്നത്. ബെംഗളൂരു ഉൾപ്പെടെയുള്ള വിവിധ ജില്ലകളിലെ ഡയറി സ്ഥാപനങ്ങൾ, പാൽ ശേഖരണ കേന്ദ്രങ്ങൾ, പാലുൽപ്പന്നങ്ങൾ വിൽക്കുന്ന സ്ഥാപനങ്ങൾ എന്നിവിടങ്ങളിൽ സംഘം പരിശോധന നടത്തുന്നുണ്ട്.
പാൽ, പാൽപ്പൊടി, പനീർ തുടങ്ങിയ ഉൽപ്പന്നങ്ങളുടെ സാമ്പിളുകൾ ശേഖരിച്ച് ലബോറട്ടറികളിൽ പരിശോധനയ്ക്ക് അയയ്ക്കുകയാണ്. ഗുണനിലവാരം, ഘടന, ലേബലിലെ വിവരങ്ങൾ, ഭക്ഷ്യസുരക്ഷാ മാനദണ്ഡങ്ങൾ എന്നിവ പാലിക്കുന്നുണ്ടോ എന്നതാണ് പ്രധാനമായും പരിശോധിക്കുന്നത്. മാനദണ്ഡങ്ങൾ ലംഘിച്ചതായി കണ്ടെത്തിയാൽ നിർമാതാക്കൾക്കും വിതരണക്കാർക്കും സ്ഥാപനങ്ങൾക്കുമെതിരെ നടപടി സ്വീകരിക്കുമെന്ന് അധികൃതർ അറിയിച്ചു.
അങ്കണവാടി കേന്ദ്രങ്ങളിലേക്ക് വിതരണം ചെയ്യുന്ന പാൽപ്പൊടിയും പനീറും പരിശോധനയുടെ പ്രത്യേക പരിധിയിലാണ്. പനീറിൽ ആവശ്യമായ അളവിൽ പാൽ ഘടകങ്ങൾ ഉണ്ടോ, നിർദേശിച്ച മാനദണ്ഡങ്ങൾക്ക് വിരുദ്ധമായി മറ്റ് പകരക്കാരായ വസ്തുക്കൾ ഉപയോഗിച്ചിട്ടുണ്ടോ തുടങ്ങിയ കാര്യങ്ങളും പരിശോധിക്കും.
മഹാരാഷ്ട്രയിൽ നിന്ന് കർണാടകയിലേക്ക് എത്തുന്ന പാലിലും പാലുൽപ്പന്നങ്ങളിലും അധികൃതർ പ്രത്യേക ശ്രദ്ധ ചെലുത്തുന്നുണ്ട്. വിപണിയിൽ ലഭിക്കുന്ന പാലിന്റെയും പാലുൽപ്പന്നങ്ങളുടെയും ഗുണനിലവാരത്തിൽ വ്യത്യാസങ്ങളും മായംചേർക്കലുമായി ബന്ധപ്പെട്ട ആശങ്കകളും ഉയർന്ന സാഹചര്യത്തിലാണ് സംസ്ഥാനതല പരിശോധന ശക്തമാക്കിയിരിക്കുന്നത്.
അതേ സമയം നന്ദിനി പാലിന്റെ വില വർധിപ്പിക്കണമെന്ന ആവശ്യം കർണാടകയിൽ ശക്തമായിരിക്കുകയാണ്. വരൾച്ച, കാലിത്തീറ്റയുടെ വില വർധന, പാൽ ശേഖരണം–സംസ്കരണം എന്നിവയിലെ ചെലവ് വർധിച്ചതാണ് വിലവർധന ആവശ്യപ്പെടുന്നതിന് പ്രധാന കാരണങ്ങളായി പാൽ സഹകരണ യൂണിയനുകൾ ചൂണ്ടിക്കാണിക്കുന്നത്.
