ന്യൂഡൽഹി: കനത്ത മഴയില്‍ മുങ്ങി രാജ്യതലസ്ഥാനമായ ഡല്‍ഹി. മഴയും ഇടിമിന്നലും ഉണ്ടായതിനെ തുടർന്ന് ന്യൂഡല്‍ഹിയിലെ ഇന്ദിരാഗാന്ധി അന്താരാഷ്ട്ര വിമാനത്താവളത്തില്‍ എത്തിച്ചേരേണ്ട 15 വിമാനങ്ങള്‍ വഴിതിരിച്ചുവിട്ടതായി വൃത്തങ്ങള്‍ ദി ഇന്ത്യൻ എക്സ്പ്രസിനോട് പറഞ്ഞു. തിങ്കളാഴ്ചയാണ് പ്രതികൂല കാലാവസ്ഥയെ തുടർന്ന് വിമാനങ്ങള്‍ മറ്റു വിമാനത്താവളങ്ങളിലേക്ക് മാറ്റിയത്.
വഴിതിരിച്ചുവിട്ട 15 വിമാനങ്ങളില്‍ 12 എണ്ണം ജയ്പൂരിലേക്കും രണ്ട് എണ്ണം ചണ്ഡിഗഢിലേക്കും ഒരെണ്ണം ലഖ്‌നൗവിലേക്കുമാണ് തിരിച്ചുവിട്ടത്. ജയ്പൂരിലേക്ക് തിരിച്ചുവിട്ട 12 വിമാനങ്ങളില്‍ മൂന്നെണ്ണം അന്താരാഷ്ട്ര സർവീസുകളായിരുന്നു. തലസ്ഥാനത്തിന്റെ വിവിധ ഭാഗങ്ങളില്‍ അതിശക്തമായ മഴയ്ക്ക് റെഡ് അലർട്ട് പ്രഖ്യാപിച്ചിരുന്നു.
ഡല്‍ഹിയിലെ മറ്റ് ജില്ലകളില്‍ മിതമായ മഴയ്ക്ക് യെല്ലോ അലർട്ടും നല്‍കിയിരുന്നു. സൗത്ത് ഈസ്റ്റ് ഡല്‍ഹി, ഈസ്റ്റ് ഡല്‍ഹി, ഷഹ്ദര, സെൻട്രല്‍ ഡല്‍ഹി, നോർത്ത് ഈസ്റ്റ് ഡല്‍ഹി, സൗത്ത് ഡല്‍ഹി, ന്യൂഡല്‍ഹി, സൗത്ത് വെസ്റ്റ് ഡല്‍ഹി, വെസ്റ്റ് ഡല്‍ഹി, നോർത്ത് വെസ്റ്റ് ഡല്‍ഹി, നോർത്ത് ഡല്‍ഹി എന്നിവിടങ്ങളില്‍ പകല്‍ സമയത്ത് ശക്തമായ മഴ ലഭിച്ചു.കനത്ത മഴയെ തുടർന്ന് നഗരത്തിന്റെ വിവിധ ഭാഗങ്ങളില്‍ വെള്ളക്കെട്ടും രൂക്ഷമായ ഗതാഗതക്കുരുക്കും അനുഭവപ്പെട്ടു.
SUMMARY: Heavy rain; 15 flights bound for Delhi airport diverted
