കൊല്ക്കത്ത: നിയമസഭാ തിരഞ്ഞെടുപ്പില് അധികാരം നഷ്ടമായതിനു പിന്നാലെ തിരിച്ചടികള് നേരിട്ട് ബംഗാള് മുൻ മുഖ്യമന്ത്രി മമതാ ബാനർജി. കഴിഞ്ഞ നിയമസഭാ തിരഞ്ഞെടുപ്പിലുണ്ടായ പരാജയത്തിന് പിന്നാലെ പാര്ട്ടിയെ ഉടച്ചുവാര്ക്കുന്നതിന്റെ ഭാഗമായിട്ടാണ് സുബ്രത ബക്ഷിയെ മാറ്റി ചന്ദ്രമതിയെ സംസ്ഥാന പ്രസിഡന്റായി നിയമിച്ചത്.
മമത തന്റെ ഏറ്റവും വിശ്വസ്തായിയ നേതാവിനെ ഈ പദവിയില് നിയമിച്ചെങ്കിലും ഒരു മാസം തികയും മുമ്പെ അവര് പടിയിറങ്ങിയത് പാര്ട്ടിയെ കൂടുതല് പ്രതിസന്ധിയിലാക്കിയിരിക്കുകയാണ്. തനിക്ക് നല്കിയിട്ടുള്ള സംസ്ഥാന പ്രസിഡന്റ് പദവിയില് നിന്നും മറ്റ് എല്ലാ ചുമതലകളില് നിന്നും ഒഴിയുകയാണെന്ന് മമത ബാനർജിക്ക് നല്കിയ രാജി കത്തില് ചന്ദ്രിമ വ്യക്തമാക്കി.
വിവിധ ബാങ്കുകളിലുള്ള പാർട്ടിയുടെ അക്കൗണ്ടുകള് കൈകാര്യം ചെയ്യാനുള്ള അധികാരം, കേന്ദ്ര തിരഞ്ഞെടുപ്പ് കമ്മീഷന് മുമ്പാകെ പാർട്ടിയെ പ്രതിനിധീകരിക്കാനുള്ള അധികാരം എന്നിവ ഇനിമുതല് തന്നില് നിഷിപ്തമല്ലെന്നും അവർ രാജി കത്തില് ചൂണ്ടിക്കാട്ടി. കൊല്ക്കത്ത സർവകലാശാലയില് നിന്ന് നിയമ ബിരുദം നേടിയ ചന്ദ്രിമ ഭട്ടാചാര്യ 2011ലാണ് നിയമസഭയിലെത്തുന്നത്.
മമത സർക്കാരില് ധനം, ആരോഗ്യം, ഭൂപരിഷ്കരണം തുടങ്ങിയ സുപ്രധാന വകുപ്പുകള് കൈകാര്യം ചെയ്തിരുന്ന അവർ മമതയുടെ ഏറ്റവും അടുത്ത സഹായിയായിരുന്നു. മമതയും അനന്തരവൻ അഭിഷേക് ബാനർജിയും നേരിടുന്ന അതിരൂക്ഷമായ ആഭ്യന്തര കലാപത്തിന്റെ ഭാഗമായാണ് ഈ രാജിയും കണക്കാക്കപ്പെടുന്നത്. പാർട്ടിയുടെ 80 എംഎല്എമാരില് 50 പേരും ഇതിനോടകം റിതബ്രത ബാനർജി നയിക്കുന്ന വിമത വിഭാഗത്തില് ചേർന്നത് തൃണമൂല് കോണ്ഗ്രസിന്റെ നിലനില്പ്പിനെത്തന്നെ ബാധിക്കുന്ന പ്രതിസന്ധിയായി മാറിയിരിക്കുകയാണ്.
വിമത വിഭാഗം ഇപ്പോള് പാർട്ടിയുടെ ഔദ്യോഗിക ചിഹ്നത്തിന് മേലുള്ള അവകാശവാദവുമായി കേന്ദ്ര തിരഞ്ഞെടുപ്പ് കമ്മീഷനെ സമീപിച്ചിരിക്കുകയാണ്. വിമതർ നടത്തുന്ന സമാന്തര പ്രവർത്തനങ്ങളെ ഔദ്യോഗിക നേതൃത്വം തള്ളിക്കളയുന്നുണ്ടെങ്കിലും, ചിഹ്നത്തിനായുള്ള നിയമപോരാട്ടം മുറുകുന്നത് പാർട്ടിയെ പിളർപ്പിലേക്കാണ് എത്തിക്കുന്നത്.
SUMMARY: Mamata’s right-hand woman Chandrima Bhattacharya has resigned from the TMC
