ചണ്ഡീഗഢ്: പഞ്ചാബില് ഭീകരാക്രമണ പദ്ധതി തകര്ത്ത് പോലീസ്. കശ്മീര്, പഞ്ചാബ് പോലീസ് സേനകളുടെ സംയുക്ത നീക്കത്തില് രണ്ട് ഭീകരരെയും അവരുടെ സഹായിയെയും പോലീസ് പിടികൂടി. പഞ്ചാബിലെ മലര്കോട്ടലയില് നിന്നാണ് ഇവരെ പിടികൂടിയത്. അബ്ബു ഗാബ, ഉസ്മാൻ എന്നീ രണ്ട് പേരെയാണ് അറസ്റ്റ് ചെയ്തത്.
ഇവർ വളരെക്കാലമായി ഇവിടെ വാടകക്കാരായി താമസിച്ചു വരികയായിരുന്നു. മയക്കുമരുന്ന് വിരുദ്ധ കാമ്പെയ്നിന്റെ ഭാഗമായി കസ്റ്റഡിയിലെടുത്ത ഒരു പ്രാദേശിക മയക്കുമരുന്ന് വിൽപ്പനക്കാരനിൽ നിന്ന് കിട്ടിയ വിവരങ്ങളുടെ അടിസ്ഥാനത്തിലുള്ള അന്വേഷണത്തിലാണ് പ്രതികളെക്കുറിച്ച് മനസിലായത്. ജമ്മു കശ്മീരിൽ മുമ്പ് രജിസ്റ്റർ ചെയ്ത ഒരു തീവ്രവാദ കേസിലെ പ്രതികളുമായി സാമ്യമുള്ളതായി പോലീസ് കണ്ടെത്തുകയായിരുന്നു. ഇതാദ്യമായാണ് ജമ്മു കശ്മീർ പോലീസ് മറ്റൊരു സംസ്ഥാനത്തെ പോലീസ് സേനയുമായി ചേർന്ന് ഇത്തരമൊരു തിരച്ചിൽ നടത്തുന്നത്.
15 വർഷത്തിലേറെയായി പ്രതികൾ ഇന്ത്യയിലെ വിവിധ സ്ഥലങ്ങളിൽ താമസിക്കുകയായിരുന്നു. ഗ്രാമത്തിലെ ആർക്കും സംശയം തോന്നാത്ത തരത്തിലായിരുന്നു ഇവരുടെ പ്രവർത്തനം. ഷെർവാനി കോട്ടെ ഗ്രാമത്തിൽ നടത്തിയ റെയ്ഡിൽ പിടികൂടിയ ഇരുവരെയും ജമ്മു കശ്മീർ പൊലീസിന് കൈമാറി. ഭീകരാക്രമണം ആസൂത്രണം ചെയ്യുന്നതിന്റെ ഭാഗമായാണ് തങ്ങൾ പഞ്ചാബിൽ തുടരുന്നതെന്ന് പ്രതികൾ പോലീസിനോട് സമ്മതിച്ചു.
ഈ അറസ്റ്റിലൂടെ വലിയൊരു ഭീകരാക്രമണ ശ്രമമാണ് പോലീസ് തകർത്തിരിക്കുന്നത്. ആസൂത്രണം ചെയ്ത ആക്രമണത്തിന്റെ സ്വഭാവം എന്തായിരുന്നുവെന്നും ഇതിൽ മറ്റാർക്കൊക്കെ പങ്കുണ്ടെന്നും കണ്ടെത്താനുള്ള ശ്രമത്തിലാണ് പോലീസ്. കൂടാതെ, ഏതൊക്കെ ബാഹ്യശക്തികളുടെ ഇടപെടൽ ഈ ഭീകരപ്രവർത്തനത്തിന് പിന്നിലുണ്ടെന്ന കാര്യവും ജമ്മു കശ്മീർ പോലീസ് അതീവ ഗൗരവത്തോടെ പരിശോധിച്ചു വരികയാണ്.
SUMMARY: Police foil terror plot in Punjab; Those arrested in drug case found to be terrorists
