പത്തനംതിട്ട: ശബരിമല സ്വര്ണപ്പാളി വിവാദത്തില് പൊലീസ് മേധാവിക്ക് പരാതി നല്കി ദേവസ്വം. വിജിലന്സ് റിപ്പോര്ട്ട് അടിസ്ഥാനമാക്കിയാണ് പരാതി നല്കിയത്. പരാതി പ്രത്യേക അന്വേഷണ സംഘത്തിന് കൈമാറും. പരാതിയില് തുടര്നടപടികള് ഉടന് ഉണ്ടാകും. പമ്പ പൊലീസ് സ്റ്റേഷനില് എഫ്ഐആര് രജിസ്റ്റര് ചെയ്യും. സ്വര്ണപ്പാളി വിവാദത്തില് ഹൈക്കോടതി ഉത്തരവ് അനുസരിച്ച് മുന്നോട്ടുപോകുമെന്നും പ്രത്യേക അന്വേഷണ സംഘം രൂപീകരിച്ചിട്ടുണ്ട്, അവര് ഇന്ന് തന്നെ അന്വേഷണം ആരംഭിക്കുമെന്നും ഡിജിപി റവാഡ ചന്ദ്രശേഖര് പറഞ്ഞു. ഇന്ന് വൈകിട്ടോടെ ദേവസ്വം വിജിലന്സ് സമര്പ്പിച്ച റിപ്പോര്ട്ട് ലഭിക്കുമെന്നും പിന്നാലെ റിപ്പോര്ട്ട് അന്വേഷണ സംഘത്തിന് കൈമാറുമെന്നും അദ്ദേഹം അറിയിച്ചു.
ശബരിമല ദ്വാരപാലക ശില്പത്തിലെ സ്വര്ണക്കവര്ച്ചയില് വന്ഗൂഢാലോചനയെന്നാണ് ദേവസ്വം വിജിലന്സിന്റെ റിപ്പോര്ട്ട്. ഭരണ നേതൃത്വത്തിന്റെ വീഴ്ചയും റിപ്പോര്ട്ടിലുണ്ട്. തിരുവാഭരണ കമ്മീഷണര് അടക്കം അന്നത്തെ പ്രധാനപ്പെട്ട ഉദ്യോഗസ്ഥരുടെ പേര് പരാമര്ശിച്ചുകൊണ്ടാണ് റിപ്പോര്ട്ട്. 2019 ല് സ്വര്ണം പൂശുന്നതിനായി ചെമ്പല്ല, സ്വര്ണപ്പാളികള് തന്നെയാണ് പോറ്റിക്ക് നല്കിയതെന്ന് തെളിയിക്കുന്ന മൊഴികളും റിപ്പോര്ട്ടിലുണ്ട്. ഇതോടെ മോഷണം നടന്നെന്ന നിഗമനത്തിലാണ് വിജിലന്സ്.
SUMMARY: Sabarimala gold theft: Devaswom lodges complaint with police chief
